طالبانو د اختر په مناسبت پیغام کې د خپل مشر له قوله له افغانستانه د بهرنیو ځواکونو تر وتلو وروسته د یوه )افغان شموله اسلامي نظام( پر جوړېدو ټینګار کړی.
طالب مشر دغه راز پر امریکا تور پورې کړی چې د دوحې له هوکړې یې په مکرره توګه سرغړونه کړې.
هغه ویلي، لاهم د طالب مشرانو نومونه له تور لیست نه دي ایستل شوي او هم د بهرنیو ځواکونو د ایستلو بهیر چې باید مې میاشت کې ترسره شوی و، سپتمبر میاشتې پورې وغزول شول.
نوموړي له افغان حکومتي مشرانو هم غوښتي، چې د جګړې د دوام هڅې ونه کړي.
پیغام کې راغلي چې طالبان د افغان قضیې مهم اړخ دی او باید هغو خلکو سره پرتله نه شي چې پرېکړې یې بل ځای کېږي او دوی ته صرف ابلاغېږي.
پیغام کې له افغان پوهانو، سیاسي او ملي شخصیتونو غوښتل شوي چې په خپل هېواد کې د سوچه اسلامي نظام د جوړېدو لپاره لاسونه سره ورکړي.
پیغام کې داهم راغلي چې اسلامي امارت خپل ټول ملت په ځانګړي ډول تجارانو او سرمایه اچوونکو ته ډاډ ور کوي چې د ټولو سر، مال او عزت به په امن وي، نه یوازې دا بلکې د فعالیت او کار لپاره به مناسب فرصتونه او زمینې ورته برابرېږي
