چین د مارچ میاشتې په ۲۹مه نېټه د “The Long March 5B” په نوم راکټ پر مټ خپل فضايي مرکز ته وسایل استولي وو، چې فضايي مرکز ته د وسایلو له رسېدو وروسته یاد راکټ په بې کنټروله ډول د ځمکې له اټوموسفیر ۱۶ نه تر ۳۷۵ کېلو متره لوړه ساحه کې داخل شوی.
فضايي ادارې دا راکټ څاري او یو شمېر فضايي اژانسونو اټکل کړی چې ښايي دا راکټ د عرض البلد له ۴۱،۵ درجو په شمال او سوېلي ساحه کې چې د امریکا له نیویارک نیولې د نیوزیلانډ تر وېلنګټون سیمه په کې داخلېږي، راپرېوځي.
کارپوهانو ویلي چې د ځمکې اټوموسفیر ته په ننوتلو ښایي دا توغندی ټوټې ټوټې شي او ځینې ټوټې یې د ځمکې په وچې برخې را وغورځي.
چینايي چارواکو بیا ویلي چې د ځمکې اټوموسفیر ته په ننوتو به د توغندي ټوټې وسوځوي او ډېر احتمال شته چې د هیڅ زیان سبب نه شي.
دغه توغندی ۱۹ ټنه وزن لري.
د چین فضايي پروګرام کې دا ډول پېښه تېر کال هم رامنځته شوې وه چې نا کنټروله راکټ بیا د عاج په ساحل کې راپرېوت؛ خو څوک یې زانمن نه کړل.
