د پنجشنبې ورځې لس نیمې بجې وې، چې د کندهار ښار د ۱۴مې حوزې اړوند له احمدولي خان څلورلارې سره نژدې پر نعمت الله روان باندې غلچکي برید وشو.
هغه تازه د ماليې وزارت د مطبوعاتو د امر په توګه دنده پیل کړې وه او تر دې وړاندې یې په خصوصي ټلویزیون طلوع نیوز کې د سیاسي بحثونو او د خبرونو د ویاند په توګه دنده مخې ته وړله.
که څه هم د هغه د وژل کېدو مسوولیت کومې وسله والې ډلې نه دی منلی، خو کندهار مېشتې خبریالان د دغې پېښې اندېښمن کړي او د جګړې له دواړو لوریو یې غوښتنه کړې چې د خبریالانو له وژلو او ګواښولو دې لاس واخلي.
د نعمت روان وژنې په کور دننه د ټولنیزو رسنیو کاروونکو او د خبریالانو د ملاتړ بنسټونو غبرګونونه راپورته کړي.
دوی دغه پېښه غندلې او له حکومته یې د د څېړلو غوښتنه کړې.
ولسمشر غني هم پر نعمت الله برید غندلی او اړوندو مسوولینو ته یې د دې پېښې د هراړخیزې څېړنې لارښوونه کړې ده.
د نعمت الله روان وژل کېدل پر داسې مهال دي، چې یوه ورځ وړاندې طالبانو په یوه خپره کړې خبرپاڼه کې خبریالانو او رسنیو ته خبرداری ورکړی و، چې د حکومت په پلوي دې له نشراتو او راپورونو نشرولو تېر شي.
د طالبانو له خبرداري سره سم حکومت هم ويلي وو چې د يو شمېر خبريالانو او شنونکو نظرونه ورته د منلو نه دي.
