د هند بهرنیو چارو وزارت وايي، داسې راپورونه يې ترلاسه کړي چې د افغانستان سرپرست حکومت د افغان هندوانو او سیکانو غضب شوې ځمکې بېرته ورسپاري.
د دې وزارت مسوولانو زیاته کړې، افغان اهل هنود او هندوانو ته د هغوی د غصب شویو ځمکو د بېرته ورکړې هرکلی کوي او په مثبت نظر ورته ګوري.
د هند بهرنیو چارو وزارت ویاند رندیر جېسوال وايي:« موږ هم یو شمېر راپورونه ترلاسه کړي. دا چې طالبانو اهل هنودو او سیکانو ته چې د هغه هېواد وګړي دي، د خپلو ځمکو د ورکړې پرېکړه کړې، موږ یې هرکلی کوو او مثبت پرمختګ یې ګڼو.»
له دې سره په قطر کې د اسلامي امارت د سیاسي دفتر مشر وايي، د غصب شویو ځمکو د تصفيې کمېسيون په کابل او ولايتونو کې د اهل هنودو ځمکې تثبيت کړي او په خبره يې له دوی يې غوښتي، چې د خپلو يادو غصب شویو ځمکو د مالکيت قانوني اسناد نوموړي کمېسيون ته وسپاري.
سهیل شاهین وايي:« د تصفیې کمېسیون چې د عدلیې وزیر تر مشرۍ لاندې جوړ شوی، ځېنو هندوانو او سیکانو ته کورونه او جایدادونه سپارلي دي. خو د هندوانو او سیکانو ټولنې له مشرانو یې د هغو کسانو د نومونو لیست او د ملکیت اسناد غوښتي کوم چې ادعا کوي کورونه یې غصب شوي دي ترڅو د هغوی اسنادو په کتلو سره دوی ته خپل کورونه او جایدادونه وروسپارل شي.»
بلخوا د سیاسي چارو یو شمېر کارپوهان وايي، د سرپرست حکومت له لوري افغان اهل هنودو او هندوانو ته د غضب شویو ځمکو سپارل به په کور دننه او بهر د حکومت معنوي ملاتړ له زياتېدو سره مرسته وکړي.
سرپرست حکومت د افغان اهل هنودو او هندوانو له شکايت وروسته، د دوی غصب شويو ځمکو د تثبيت او بېرته ازادولو لړۍ پيل کړه.
چارواکو ډاډ ورکړی، چې د يادې لړۍ له بشپړېدو وروسته به په کابل او ولايتونو کې اهل هنود او هندوانو ته خپلې ځمکې او نور جايدادونه بېرته وسپاري.
