که څه هم د مرغانو پالل شوق دی، خو د ډېرو لپاره بیا د خپلې کورنۍ د نفقي پیدا کولو وسیله هم ده.
د کندهار ښار په زړه کې د مرغانو دې بازار کې سلګونه کسان د مرغانو کاوربار کوي او له دې لارې د خپلو کورونو اړتیاوې پوره کوي.
د زینتي او نورو مرغانو یو شمېر کاروباریان وايي، دې وروستیو کې د خلکو خراب اقتصادي وضعیت د دې لامل شوی، چې کاروبار يي اغیزمن شي.
د مرغانو پلورونکی اختر محمد وايي:« د پخوا پرتله کاروبار خرابه شوی او د مرغانو خو بیخي نشته، ځکه دا د ضرورت شی نه دی، دا د مستۍ شی دی.»
د مرغانو پلورونکی ګلالی بیا وايي:« د مرغانو کاروبار اوس بیخي کم شوی، د خلکو کاروبار کمزوری دی، زموږ کاروبار هم ورسره کمزوری شوی. خلکو د مرغانو شوق نه کوي، ځکه کاروبار نه شته، پیسې نه شته. »
ځینې نور بیا وايي، اوس مهال دغه ولایت کې د زینتي مرغانو د ساتلو شوق کم شوی او هم په لارو کې د ستونزو له امله بهرني مرغان نه راوړل کیږي چې له امله یې کاروبار کمرنګه شوی.
د مرغانو یو تن پلورونکی محمد طاهر وايي:« مرغان ډېری له جرمني، پاکستان، هند او ایران راځي. ایرانۍ زرکې هم دلته خرڅېږي، زموږ او ستاسو د غرونو زرګې هم خرڅېږي.»
د مرغانو پلورونکی عبدالله وايي:« زه هر ډول مرغان زرکې، کنري، چوغکي او واټر ساتم. ډېری له کراچۍ راځي. له خپل هېواد هم راځي، له لوګر او کابل ولایتونو هم راځي.»
د کندهار ښار مرغانو بازار کې کنري، طوطیان، زرکان او نور ډول ډول مرغان شته چې ځینې يې تر ۱۰۰ زره افغانیو هم لوړه بیه لري.
د مرغانو د پلورونکو په وینا اوس خلک ډېر ګران مرغان نه پیري.
