د افغان سولې په اړه د ترکیې ناسته د دویم ځل لپاره وځنډېده
د ترکیې د بهرنیو چارو وزیر مولود چاووش اوغلو ویلي، له امریکا، قطر او ملګرو ملتونو سره په مشوره یې د افغان سولې په اړه د ترکیې ناسته ځنډولې.
هغه وايي، پام کې ده چې د ترکیې ناسته به له روژې میاشتې وروسته ترسره شي.
اوغلو زیاتوي، ناسته کې د رامنځته شوي ځنډ په مرسته ښکېل اړخونه کولی شي د دغې ناستې د ګډونوالو نوملړ په سمه توګه ترتیب کړي.
ټاکل شوې وه چې د افغان سولې په اړه د ترکیې ناسته د روانې اپرېل میاشتې په ۲۴مه نېټه بیل او د لسو ورځو لپاره دوام وکړي.
د یادې ناستې د ځنډ یو لامل په ناسته کې د طالبانو نه ګډون ښودل شوی.
طالبانو وروسته له هغه د ترکیې ناسته کې له ګډون انکار وکړ چې امریکا په سپټمبر ماشت پورې د خپلو د سرتېرو ایستلو اعلان وکړ.
