لغمان، ننګرهار، کونړ او نورستان د هېواد له هغو طبیعي ښکلا لروونکي ولایتونو دي، چې د پسرلي په را رسېدو سره د ګڼو کورنیو او بهرنیو سیلانیانو کوربه وي.
ختیځو ولایتونو ته راغلي سیلانیان وايي، د کوچني اختر په ورځو کې د کونړ ـ جلال آباد پر لویه لار ترافیکي ګڼې ګوڼې، بې نظمۍ، د لویو لارو خرابوالي او د لویو لارو په اوږدو کې د ترافیک پولیسو نشتوالي له ستونزو سره مخ کړي.
دوی وايي، یادو ستونزو ګڼ سیلانیان په تفریح وتلو منصرفه کړي او په دې برخه کې د لازمو اسانتیاوو غوښتنه کوي.
یو تن سیلاني وايي:« ډېری داسې خلک دي چې راځي خو دا ګڼه ګوڼه زغملی نه شي او بېرته ګرځي.»
یو بل سیلاني بیا وايي:« موږ ۸ بجې راوتلي یو، شاوخوا دوه ساعته کېږي، چې حرکت مو نه دی کړی.»
سیلانیان او د ننګرهار اوسېدونکي دغه راز له سرپرست حکومته غوښتنه کوي، چې د کونړ ـ جلال آباد لویې لارې د پراختیا او د یادې لویې لارې د بدیل لپاره بېړني ګامونه پورته کړي؛ ترڅو خلک او سیلانیان راتلوونکې کې له ستونزو سره مخ نه شي.
یو تن سیلاني وايي:« که حکومت سړکونه پراخه کړي او ښې او مناسبې لارې جوړې کړي، ترڅو هېوادوال په اسانۍ سره مېله ځایونو ته ځانونه ورسوي او له خپلو مېلو خوند واخلي.»
بل لور ته د ننګرهار د ترافیکو مدیریت مسوولین د سیلانیانو ستونزې او شکایتونه مني؛ خو په دې برخه کې د لازمو اقداماتو ډاډ ورکوي.
د ننګرهار ولایت ترافیکو مدیر جواد شېرزاد وايي:« میاشت وړاندې یې موږ ته شاوخوا ۱۲۰ تنه نور تشکیل راکړ، خو دغه تشکیل له تورخم پورې، د کامې تر پله پورې، د فامیلو چوک پورې، درونټې پورې او د سره رود ولسوالۍ پورې مو ځای پر ځای کړي.»
د ننګرهار د اطلاعاتو او کلتور ریاست د مالوماتو له مخې، په تېر یوه کال کې لسګونه بهرنیو سیلانیانو د ننګرهار له تاریخي او تفرېحي سیمو لیدنې کړي او ډاډ ورکړل شوی، چې ټولو کورنیو او بهرنیو سیلانیانو ته به د سیاحت او تفرېح لپاره لا نورې اسانتیاوې هم برابرې کړي.
