نن د «سل ورځې، سل زیري» تر نامه لاندې پروګرام په ارګ کې جوړ شوی و، چې ولسمشر غني په کې په یو وار سل پروژې پرانیستې. له دغو سلو پروژو څخه یې ۲۸ بشپړې شوې دي.
دغه پروژې چې ټولګټې دي، د ولسمشر له لوري په انلاین ډول د کابل سربېره په کاپیسا، میدان وردګو، لوګر، پکتیا او یو شمېر نورو ولایتونو کې پرانیستل شوې.
په دغو مراسمو کې د چارو ادارې رئیس فضل محمود فضلي وویل: «نن د فواید عامې وزارت، کابل ښاروالۍ او پلازمینې زون پراختیا ادارې له لوري په ښاري ودې او لار جوړولو اونۍ کې د ۲۵،۴ میلیارد افغانیو په ارزښت بشپړې شوې ۲۸ بېلابېلې پروژې پرانیستل کېږي.»
په دغه مراسمو کې ولسمشر غني بیا ټینګار وکړ چې له دې وروسته به پروژې دویم او د دریم لاس ته نه پرېښودل کېږي او د یو شرکت له لوري به یې چارې سرته رسېږي.
په دغه سل پروژو چې یو شمېر یې ګټې اخیستنې ته اماده دي او په ځینو یې اوس کار پيلېږي، څه باندې ۲۵ میلیارده افغانۍ لګښت راځي.
په دغو مراسمو کې د کابل ښاروال وویل، ۳۰۰ میلیونه متره مربع ځمکه یې د غاصبینو له منګولو خلاصه کړې ده او دغه لړۍ روانه ده.
