وسله والو تېره شپه د پکتیا ولایت په احمد ابا ولسوالۍ کې د واده پر کور برید کړی او زوم یې وژلی دی.
د پکتیا د امنیه قومندانۍ ویاند محمد لعل امیري وايي، وسله والو د احمد ابا ولسوالۍ اړوند مچلغو بند سیمه کې د یوه قومي مشر جان محمد او د ولسي پاڅون کوونکو د یوه قومندان پر کور بریدونه کړي دي.
امیري زیاتوي چې د قومي مشر جان محمد په کور کې د واده مراسم روان و، چې د وسله والو پرې برید کړی او زوم یې وژلی دی.
محمد لعل امیري وايي، د ولسي پاڅون کوونکي د قومندان پر کور برید کې د نوموړي د کورنۍ یو غړی ټپي شوی او په ځوابي ډزو کې دوه تنه وسله وال وژل شوي چې جسدونه یې سیمه کې پاتې دي.
د دغې پېښې مسوولیت تراوسه کومې ډلې نه دی منلی.
