د ملي روغې جوړې عالي شورا څلورمه ناسته ترسره کړه چې په کې د دغې شورا د رییس او غړو ترڅنګ پخواني ولسمشر حامد کرزي، جهادي مشر عبدالرب رسول سیاف او یو شمېر نورو سیاسي څېرو ګډون کړی وه.
د ملي روغې جوړې د عالي شورا مشر چې د دغې شورا د رهبرۍ کمېټې څلورمه ناسته کې یې وینا کوله وویل، موږ باید د امریکا له لوري د وړاندې شوې طرحې او د افغان سولې په تړاو د سېمه یزه ناستو په اړه روښانه او ښکاره درېځ ولرو.
هغه زیاته کړه موږ د بحثونو له طرحې وېره نه لرو خو د افغانانو او د افغانستان اسلامي جمهوریت غوښتنې باید روښانه شي.
عبدالله عبدالله زیاته کړه چې زموږ مرکچې پلاوی د افغانانو او افغان حکومت له غوڅ ملاتړ څخه برخمن دی او په وینا یې د سيمې او نړۍ رېښتنې هڅې د سولې د روان بهیر بریا تضمینوي.
ناسته کې د سولې پروسې پر چټکتیا، له افغان سولې څخه د ملي، سيمه ییزې او نړیوالې اجماع پر ځواکمنتیا او همدا راز د تاوتریخوالي پر پای ته رسېدو او تل پاتې اوربند ټینګار وشو.
