د امریکا ولسمشر جوبایډن د پاکستان نوي لومړي وزیر ته په اسلام اباد کې د خپل سفارت په لاس په استول شوي لیک کې ویلي، امریکا په سیمه او نړۍ کې د ننګونو پر وړاندې د پاکستان ملاتړ کوي.
په دغه لیک کې له دې سربېره، چې د پاکستان له اقتصادي او تعلیمي برخو ملاتړ شوی، له دغه هېواد سره اړیکې او دوه اړخېزه همکاري د سیمې او نړیوال ثبات لپاره مهمه بلل شوې.
جوبایډن وايي: « د دواړو هېوادونو تل پاتې ملګريتوب د خلکو او نړۍ امنیت او ثبات تامینوي. امریکا به په سیمه او نړۍ کې د مهمو اغېز لرونکو ننګونو پر وړاندې د پاکستان ملاتړ ته ولاړه وي او همدارنګه امریکا د پاکستان له اقتصادي او تعلیمي پرمختګونو او د بشري حقونو د اعادې په برخه کې همکارۍ ته دوام ورکوي.»
په ورته مهال له غبرګون پرته د لیک منځپانګه د پاکستان لومړي وزیر شهباز شریف پرخپله اېکس پاڼه هم خپره کړې.
بل خوا د چارو یو شمېر کارپوهان وایي، امریکا په سیمه کې خپل سیاسي او استخباراتي اهداف د پاکستان له ادرسه مخته وړي او په خبره يې پاکستان د امریکا او لوېدیځ لپاره د همدې موخو پر بنسټ د نورو هېوادونو په پرتله زيات ارزښت لري.
د سیاسي چارو کارپوه اخترمحمد راسخ وايي: « زه ویلی شم چې پاکستان له ایجاده تر ننه پورې د غربي نړۍ د استخباراتي او سیاسي پرګرامونو مخې ته وړلو لپاره په سیمه کې رامنځته شوی دی. د غربي نړۍ د دوښمنۍ له ادرسه چې له روسانو سره یې لري، په دغه سیمه کې د روسانو د ځپلو او د دوی د پرمختګ د مخنیوي لپاره یې څنګه دوی د ګرمو اوبو مخه ونیوله او شوروي اتحاد یې په روسیه بدله کړله او ترڅنګ یې په غربي نړۍ کې د روسانو د نفوس مخنیوی وکړ.»
د سیاسي چارو کارپوه ادریس محمدي ځاځی بیا وايي، له پاکستان سره د امریکا دا ډول اړیکې به له ګاونډیوهېوادونو سره د دغه هېواد پر اړیکو ناوړه اغېزې ولري.
ځاځی زیاتوي: « دا به دغه موضوع او یا حالات نور هم سره پېچلي کړي او نور به یې هم کشاله داره کړي، دا که د پاکستان له ګاونډیو سره دي او که پاکستان کې دننه حالات دي. دا ملاتړ به وکولی شي چې د پاکستان داخلي او بهرنۍ پالېسۍ زیانمنې کړي او د دوی اړیکې له ګاونډیانو او همداشان په داخل کې د ملتونو ترمنځ د نفاق لامل وګرځي.»
د پاکستان نوی ایتلافي حکومت چې نږدې یوه میاشت وړاندې رامنځته او د سیاسي بې ثباتۍ او لړزاند اقتصاد سره مخامخ دی، د لومړي ځل لپاره د امریکا ولسمشر له لوري په ځېنو سیاسي او اقتصادي برخو کې د همکارۍ ډاډ ورکول کېږي.
