واک ته د اسلامي امارت له رسېدو وروسته که څه هم اسلامي امارت په ځلونو له ترهګرۍ سره پر مبارزې ټینګار کړی؛ خو داسې برېښي چې په دې برخه کې د نړیوالې ټولنې اندېښنې پر خپل ځای دي او له همدې کبله وخت په وخت پر دې خبره ټینګار لري.
د امریکا بهرنیو چارو وزارت ویاند مټیو میلر د یوه خبري کنفرانس پر مهال یو ځل بیا له اسلامي امارت د ترهګرۍ پر وړاندې د مبارزې غوښتنه کړې.
میلر له اسلامي امارت غوښتي چې له ترهګرۍ سره د مبارزې په برخه کې خپلې ژمنې عملي کړي.
میلر وايي:« موږ دې ته ژمن یو چې ډاډه شو افغانستان هېڅ کله بیاځلې د ترهګرۍ د خیز پر تختې بدل نه شي او موږ غواړو طالبان ته دې اړ کړو چې له نړیوالې ټولنې د ترهګرۍ ضد مبارزې برخه کې خپلې ژمنې عملي کړي. موږ طالبانو ته دا واضح کړې چې دا د دوی مسوولیت دی چې موږ ډاډه کړي چې هغوی ترهګرو ته خوندي پټنځایونه نه ورکوي هغه القاعده، د داعش خراسان څانګه یا بله وسله واله ډله کېدای شي. موږ او زموږ نړیوال ائتلاف د دې وسله والو ډلو د ګواښونو پر وړاندې هوښیار یو.»
اسلامي امارت د امریکابهرنیو چارو وزارت دې څرګندونو ته غبرګون نه دی ښودلی خو له دې وړاندې یې د ترهګرۍ د پراخېدا په برخه کې د نړیوالو اندېښنې بې ځایه بللي دي.
اخوا د سیاسي چارو یو شمېر شنونکي هم په تېرو شاوخوا دوه نیمو کلونو کې په کور دننه د ترهګرۍ پر وړاندې د اسلامي امارت له لوري شوې مبارزه بریالۍ او اغېزمنه بللې.
د سیاسي چارو کارپوه اختر محمد راسخ وايي:« طالبانو په نږدې درېیو کلونو کې د امنیت په راوستلو او د تروریزم پر وړاندې مبارزه کې بریالي او ګړندي ګامونه پورته کړي، دا د ستاینې وړ دي. د تروریزم پر وړاندې مبارزه کې نړیوال دنده لري، چې له طالبانو سره لاس په کار او همکار واوسي.»
ځېنې نور بیا په دې باور دي، که نړۍ غواړي په رېښتینې ډول له ترهګرۍ مبارزه وکړي دغه مبارزه باید یوازې افغانستان پورې ونه تړي.
دوی په دې برخه کې د نړۍ هر اړخېزه همکاري د نړیوالې ټولنې ګډ مسوولیت ګڼي.
دا په داسې حال کې ده چې له دې وړاندې ملګرو ملتونو او د نړۍ او سیمې ګڼو هېوادونو او د داعش په ګډون د ورته وسله والو ډلو پر وړاندې د اسلامي امارت مبارزه ستایلې ده.
