قطر کې د طالبانو د سیاسي دفتر ویاند محمد نعیم بي بي سي ته په لېږلي پیغام کې ویلي، د دوحې د سولې تړون باید په دوه اړخیزه توګه عملي شي.
محمد نعیم ویلي، دوی پر خپلو ژمنو ولاړ دي او له امریکا یې هم غوښتي چې پر ژمنو ودرېږي.
طالبانو په افغانستان کې د ستونزې د حل اصلي لاره دیپلوماتيکې هڅې بللي او ورسره یې له دغه هېواده د بهرنیو ځواکونو وتل او د سولې هوکړې د عملي کېدو برخه کې عملي ګامونه تر ټولو مهم بللي دي.
طالبان دا خبرې داسې مهال کوي چې د امریکا د ملي امنیت شورا سلاکار د جمعې په ورځ له خپل افغان سیال سره پر ټیلیفوني خبرو کې ویلي، سپینه ماڼۍ هڅه کوي د سولې پر شوې هوکړه له سره کتنه وکړي.
