د خوست ولایت نادر شاه کوټ ولسوالۍ د څوۍ سیمې اوسېدونکي وایي، په سیمه کې هېڅ ښوونځی نه لري او ماشومان یې له زده کړو لرې پاتې دي.
د دوی په خبره، یادې سيمې ته په تېر کې هيڅ کار نه دی شوی او له اسلامي امارته غواړي چې یادو ستونزو ته دې ژر تر ژره رسېدنه وکړي.
د څوۍ سیمې یو تن اوسېدونکی زیت الله وايي:« زموږ سیمه ډېری وختونه د جنګ پر مرکز بدله وه، نو له دوی( حکومت) غوښتنه کوو، زموږ فکرونه، ځوانان، راتلونکی نسل چې ماشومان یې تشکیلوي، پر دې باید کار وکړي، ترڅو مو راتلونکی روښانه شي.»
د څوۍ سیمې اوسېدونکي وایي، د نورو ګڼو اساسي اړتیاوو سربېره په روغتیایي برخه کې هم له سختو ستونزو سره مخ دي.
د څوۍ سیمې قومي مشر ولي زنګ وايي:« ډېر زیات له ستونزو سره مخ یو. تېره شپه ماته خپله یو عاجل مریض پېښ شو. زه خپله یوه نیمه بجه له کوره ووتلم، خلک ټول وېده ول، موټر نه پیدا کېده.»
د څوۍ سیمې یو بل اوسېدونکی حاجي محمد وايي:« هېچ چا موږ ته توجو نه ده کړې. موږ له لوړپوړو چارواکو دا غواړو چې راته خدمت وشي، موږ ته موسسې کار وکړي. زموږ سیمه له موسساتو محرومه ده.»
ورته مهال ځایي چارواکي د یادې سيمې شته ستونزې مني، خو وایي، هڅه کوي چې رسېدنه ورته وکړي.
د چارواکو په خبره ولايتي اداره پلان لري چې د نادرشاه کوټ ولسوالۍ اړوند د څوۍ سيمې سربېره ټولو هغو لرې پرتو سيمو ته د متوازن انکشاف له مخې پرمختيايي چارې ترسره کړي، چې په تېر کې ورته کار نه دی شوی
د خوست مرستال والي محبوب شاه قانت وايي:« موږ به انشاء الله د دوی دا وړاندیز د پوهنې له ریاست سره هم شریک کړو او اړونده موسسې به هم دې ته متوجې کړو،چې هلته هغه اولیه ضرورتونه، د بېلګې په ډول ښوونځی دی، کلینیک دی، دې ته توجه وکړي، ترڅو اړتیاوې یې پوره شي.»
د نادرشاه کوټ ولسوالۍ څوۍ سیمه د خوست له مرکزه ۴۰ کلیومتره لرې پرته ده چې اوسېدونکي یې له مسوولینو ورته د پاملرنې خبره کوي.
یوازې څوۍ سیمه نه بلکې د خوست نورې سیمې هم له ورته ستونزو سره مخ دي او له چارواکو د اقداماتو غوښتنه کېږي.
