د افغان ښځو، نجونو او بشري حقونو په چارو کې د امریکا ځانګړې استازې رینا امیري د حقایقو خبراوي حق د نړیوالې ورځې په مناسبت یو ځل بیا له اسلامي امارته غوښتي ترڅو د ټولو افغانانو حقونو خوندیتوب ته ارزښت ورکړي او هغه کسان چې په خپل سري ډول نیول شوي کورنیو ته دې حساب ورکړل شي.
امیري زیاته کړې:« د حقایقو خبراوي حق نړیوالې ورځې په مناسبت موږ پر طالبانو غږ کوو چې د ټولو افغانانو حقونو ته درناوی وکړي او د خپلسري نیول شویو کسانو کورنیو ته حساب ورکړي ، هغه کورنۍ چې د خپلو عزیزانو په لټه کې دي.»
خو د اسلامي امارت ویاند ذبیح الله مجاهد بیا وايي، په افغانستان کې د نارینه وو او ښخینه وو حقوقونو ته ژمن دي او په خبره یې دا یې مسوولیت دی چې د ټولو حقوق تامین کړي.
هغه زیاته کړې:« د افغانستان اسلامي امارت مسوولیت لري، الهي مسوولیت، چې د خپلو خلکو خدمت وکړي او د خپلو خلکو حقوق ورکړي. دا کار د چا لپاره نه کوي، نه د کوم هېواد د فشار له امله، بلکې د خپلې وجیبې د ترسره کېدو لپاره دا کار کوي. الله ج په اسلامي حکومت دا واجبه کړې چې د هغه حکومت د خلکو شرعي حقوق ورته ورکړل شي. دا د حکومت وظیفه ده او اسلامي امارت په دې کې ټوله هڅه کړې او کوي یې چې د خپلو خلکو چې نارینه دي او که ښځینه حقوق یې باید ورکړي.»
د سیاسي چارو شنونکو په اند نړیوال په خپلو خبرو کې زیاتونه کوي ، خو اسلامي امارت ته هم پکار ده ترڅو خپلې اړیکې له ملت سره باوري کړي ترڅو په کور دننه او بهر باور ترلاسه کړي.
د سیاسي چارو شنونکی اسلم دانشمل وايي:« پکار دا ده چې رینا امیري په خپلو راپورونو کې له تعادل څخه کار واخلي، د افغانستان له بشر حقونو دې سیاسي استفاده نه کوي. زموږ پر دولت دې سیاسي فشار نه راوړي. له بل اړخه د افغانستان اسلامي امارت دولت ته هم پکاره ده چې د نړیوالو میثاقونو او نړیوالو اصولو له مخې د اتباعو لپاره اصول او قوانین رامنځته کړي ترڅو په هغه کې د اتباعو حقوق او وجایب تعریف شوي واوسي.»
د حقایقو خبراوي حق ورځ هر کال په نړۍ کې له بشري حقونو د سختو سرغړونو د قربانیانو یاد ته د درناوي په موخه نمانځل کیږي ، چې د حق او عدالت ارزښت ته اهمیت وربښي ، چې په دې لړ کې د بشري حقونود قربانیانو کورنۍ دې حق ته رسیږي ، څو پوه شي له عزیزانو سره يې څه پېښ شوي دي ، دوئ اختطاف شوي، شکنجه شوي ، اعدام شوي او یا د نورو ظلمونو په لمن کې قرباني شوي.
