د جو بایډن د ملي امنیت سلاکار په تازه څرګندونو کې ویلي د سولې هوکړه یوازې کلمات نه دي بلکې ژمنتیا مهمه ده او طالبانو ته په کار ده چې د خپلو ژمنو پر بنسټ له القاعده شبکې سره اړیکې پرې کړي.
جک سلیوان په خپلو تازه څرګندونو کې ویلي د طالبانو او امریکا ترمنځ د سولې هوکړه لاسلیک شوې ده او اوس ددې وخت دی چې د افغان حکومت او طالبانو ترمنځ هم د سولې هوکړه و شي.
سلیوان همدا راز ټینګار کړی چې طالبان دې د تاوتریخوالي د کمولو په برخه کې هم خپلې ژمنې عملي کړي.
له بل لوري طالبانو بیا پر امریکا نیوکه کړې چې له دوی سره شوې هوکړه یې نقض کړې ده.
د طالبانو له لورې په خپره شوې خبر پاڼه کې ادعا شوې ده چې امریکايي ځواکونو له تېرې ورځې را پر دې خوا په ننګرهار، کندهار او هلمند کې په غیر جنګي سیمو بمبار کړی چې دا د هوکړې څخه سرغړونه ده.
طالبانو ګواښ کړی که امریکا خپلو تېروتنو ته دوام ورکړي د دوی له جدي عکس العمل سره به مخ شي.
