که څه هم کابل په وار وار افغانستان کې د ترهګرۍ موجوديت او ودې په اړه د نړيوالو اندېښنې رد کړي، خو امریکا یو وار بیا ويلي، نه غواړي افغانستان یو ځل بیا د ترهګرۍ پر خوندي پټنځای بدل شي.
د امريکا بهرنيو چارو وزارت د ویاند مرستیال وډانټ پټېل په دې برخه کې د خپل هېواد دریځ واضح بللی او پاکستان یې له ترهګرۍ سره د مبارزې په برخه کې د امریکا همکار یاد کړی.
نوموړي ویلي، امریکا له پاکستان سره د دوه اړخېزو سلامشورو او همکاریو ترڅنګ په دې برخه کې هم له نږدې په اړیکه کې دی.
پټېل وايي: « ډېر ښه، د دې حقیقت په تړاو زموږ دریځ واضح دی، چې موږ نه غواړو افغانستان بیا ځلې د ترهګرۍ پر خوندي پټنځای بدل شي او له پاکستان سره د ترهګرۍ پر وړاندې د همکارۍ په برخه کې زموږ خبره دا ده، چې له پاکستان سره همکاري کوو، دا هغه څه دي چې موږ له یو بل سره د نورو دوه اړخېزو سلامشورو ترڅنګ په منظمه توګه سره بوخت یوو.»
خو بل پلو بیا د اسلامي امارت ویاند ذبیح الله مجاهد د ترهګرۍ په تړاو د نړۍ او امریکا اندېښنې بېځایه ګڼي او له دې پدیدې سره پر جدي مبارزې ټینګار لري.
مجاهد وايي، اسلامي امارت دا مهال پر ټول هېواد حاکمیت لري او په خبره یې هېچاته د دې اجازه نه ورکوي چې له افغان خاورې د ترهګریزو فعالیتونو په موخه استفاده وکړي.
هغه زیاتوي: « بې له شکه چې افغانستان اوس امن دی، ثبات لري او واحد حکومت په کې حاکم دی چې ټوله جغرافیه یې تر کنټرول لاندې ده، دلته هېڅ خپلسرې ډلې ټپلې نشته او نه اجازه لري. د افغانستان اسلامي امارت هم چاته اجازه نه ورکوي چې د افغانستان خاوره د چا پر وړاندې وکاروي؛ نو داسې حالاتو کې د اندېښنې څرګندول پر ځای نه دي، څوک دې اندېښنه نه کوي، افغانستان نور د امن او سولې ځای دی.»
بل پلو د سیاسي چارو یو شمېر شنونکي هم له ترهګرۍ د مبارزې په نوم له پاکستان سره د امریکا او نړیوالې ټولنې پر پریمانه مرستو نیوکه لري.
دوی وايي، پاکستان د خپلو اوږدمهاله پالېسیو او سیاستونو له مخې د ترهګرۍ له نوم څخه ابزاري استفاده کړې نو له همدې کبله یاد هېواد نه یوازې دا چې په دې برخه کې یې صادقانه مبارزه نه ده کړې، بلکې د خپل دوه مخي سیاست پراساس د ترهګرۍ له پاللو او ودې څخه خپلو موخو ته د رسېدا لپاره ګټه اخېستې.
د سیاسي چارو شنونکی توریالی ځاځی وايي: « امریکا باید پاکستان سره نه بلکې له طالبانو سره همکاري وکړي، ځکه چې پاکستان دی چې ترهګریزې ډلې او ټپلې په کې روزل کېږي، د ترهګریزو ډلو ټپلو ځاله پاکستان دی، دا د امریکا لویه تېروتنه چې له پاکستان سره همکاري کوي.»
امریکا داسې مهال په افغانستان کې د ترهګرۍ له پراخېدا اندېښنه ښيي او له پاکستان سره د همکارۍ ټټر وهي چې له دې وړاندې د ګڼو پوځي چارواکو په ګډون، د امریکا مخکېني ولسمشر ډونالډ ټرامپ هم د خپلې ولسمشرۍ په موده کې په ځلونو پر پاکستان له دې کبله نیوکه کړې چې ګواکې پاکستان د ترهګرۍ ترعنوان لاندې په کلني ډول له امریکا میلیاردونه ډالر اخېستي؛ خو په مقابل کې یې یوازې امریکا تېر ایستې ده.
