د بې پولې خبریالانو سازمان یا ار ایس ایف ویلي، په روان زیږدیز کال کې په ټوله نړۍ کې ۵۰ خبریالان وژل شوي دي.
دغه سازمان پخپل راپور کې ویلي چې د یادو خبریالانو زیاته برخه په هغو هیوادونو کې وژل شوي چې په سوله کې ژوند کوي.
د بې پولې خبریالانو سازمان نن سې شنبه، په دې اړه راپور کې ویلي چې په دغه موده کې تر ټولو زیات خبریالان په مکسیکو، عراق، افغانستان، پاکستان، فلیپین او هند کې وژل شوي دي.
په تېرو شااوخوا دوو میاشتو کې څلور افغان خبریالان په هدفي بریدونو کې ووژل شول.
محمد الیاس داعي، رحمت الله نېکزاد، ملاله میوند او یما سیاوش هغه خبریالان و چې د روان کال وروستیو کې په ماین چاودنو او وسله وال برید کې ووژل شول.
