د ملګرو ملتونو مرستندویه دفتر یا یونما په یوه خپره کړې اعلامیه کې ویلي چې په څو ورځو کې د افغانستان په بېلو سیمو کې پر ملکي وګړو هدفي بریدونه ترسره شوي دي.
د سرچینې په خبره دا بریدونه د ولسي جرګې پر یوه غړي، درېیو ډاکټرانو، یوه مشهور خبریال او د ټاکنو د څار یوه بنسټ پر مشر شوي دي.
یونما دغه بریدونه په کلکو ټکو غندلي او په خبره یې ددې جدي اړتیا ده چې په افغانستان کې اوربند وشي، د انسانانو ژوند وساتل شي او د تېرو لاس ته راوړنو حفاظت وشي.
یونما یو ځل بيا ټینګار کړی چې بین الافغاني مذاکرات باید ژر پيل شي او ژر دې دواړه لوري دایمي اوربند ته سره ورسېږي څو دلته خونړۍ جګړه پای ومومي.
