د افغانستان د ازادو او عادلانه ټاکنو بنسټ اجرایوي مشر د چهارشنبې به سهار شاوخوا نهه بجې هغه مهال د کابل ښار اوومې ناحیې اړوند سیمه کې د دوه تنو وسلهوالو بریدګرو لخوا په ډزو ووژل شو، چې د سولې څار ایتلاف موجودیت پرانیست غونډې ته پر لاره وو.
دغې پېښې په کور دننه او بهر توند غبرګونونه را پارولي او له حکومت نه غوښتنه شوې چې د پېښې عاملین دې ونیسي.
ولسمشر غني، داکتر عبدالله عبدالله، د مذاکراتي ټیم غړو، ګڼو سفارتونو او بنسټونو دغه برید غندلی او د افغانستان ټاکنیز قانون، ولسواکۍ او له ټاکنو د څار برخه کې یې د یوسف رشید هڅې او لاسته راوړنې اغېزمنې بللې دي.
ولسمشرۍ ماڼۍ وایي: ((د افغانستان حکومت کابل ښار کې پر یوسف رشید ترهګریز برید په کلکو ټکو غندي او دغه ترهګریز عمل د بیان پر آزادۍ او ټاکنیزو بنسټونو برید بولي. د افغانستان دښمنان نه شي کولی په دغسې کړنو د افغانانو د پرمختګ مخه ونیسي.))
د ملي مصالحې عالي شورا رییس داکتر عبدالله عبدالله هم د رشید په وژنه توند غبرګون او خفګان ښودلی او ویلي یې دي چې تاوتریخوالی، ویره او وژنې په هیواد کې د روان کړکېچ حل لار نه ده.
کابل کې د امریکا سفارت هم دغه برید غندلی او خواشیني یې ښودلې.
کابل کې د امریکا سفارت چار سمبالی لیکلي: ((یوسف رشید په افغانستان کې د ولسواکۍ یو خدمتګاره او ریښتینی مدافع و. امریکا پر یوسف رشید برید غندي او ټولو هغو افغانانو ته چې رشید سره یې پيژندګلوی درلود، تسلیت وايي.))
د مذکراتي ټیم غړو هم دغه برید غندلی او دا یې پر ولسواکۍ او انسانیت برید بللی دی.
د جمهوریت مذاکراتي ټیم غړی نادر نادري ویلي: (( ترهګرو، یوسف رشید د ازاد افغانستان لپاره د شل کلن خدمت او هڅو په خاطر شهید کړ. هغه مدني فعال، خدمتګار او وطن دوسته انسان و.))
د نورو افغان سیاسیونو، مدني ټولنې غړو، ژورنالیستانو او چارواکو سربیره د افغان حکومت د مذاکراتي ټیم غړې فوزیه کوفي هم دغه برید غندلی او پر استخباراتي او امنیتي ارګانونو یې نیوکې کړي چې د هدفي وژنو او چاودنو په مخنیوي کې پاتې راغلي دي.
د یوسف رشید او د هغه د تره د زوی جنازه د چهارشنبې په ماسپښین دوه نیمې بجې د اوومې ناحیې اړوند ټني کوټ سیمه کې ادا او په هماغې سیمه کې خاورو ته وسپارل شوه.
