وروسته له هغې چې سرپرست حکومت واک ته ورسېد، ورسره سم د دولتي ادارو په ګډون په نړيوالو ادارو او خصوصي سکټور کې د ښځو له لوري پر کار کولو بندیز ولګول شو، چې دې چارې ښځې له زیاتو اقتصادي او یو شمېر يې ان له رواني ستونزو سره لاس او ګرېوان کړې.
خو ځینې ښځې د کورنيو سرپرستۍ او اقتصادي ستونزو اړې کړې، چي په کوچنیو او متوسطو شخصې کارونو پانګونه وکړي.
ظریفه رضايي یوه له هغو ښځو ده، چې واک ته د نوي حکومت له رسېدو وروسته يې خپله دنده له لاسه ورکړه او له زیاتو اقتصادي ستونزو سره مخ شوه.
رضايي وايې، د دندي له لاسه ورکولو وروسته ارامه نه ده ناسته او سملاسي يې پر کمو پيسو شخصي کاروبار پيل کړ، چې اوس يې د کار ساحه پراخه شوې او توانېدلې، چي د خپلې کورنۍ اړتیاوې پوره کړي.
رضايي زیاتوي: « یوه ښځه له ډېرو ستونزو او کړاوونو تېرېږي تر هغې چې کاروبار یې تر یوه ځایه رسېږي او دا طبیعي خبره ده چې د کاروبار په پیل کې ستونزې او جنجالونه وي، اقتصاد ضعیف وي؛ خو له دې هر څه سره بیا هم باید حوصله له لاسه ور نه کړو او ناهیلې نه شو، ماتی ونه منو او خپل کار ته ادامه ورکړو.»
په ورته مهال یو شمېر نورې کاروباري ښځې بیا وايي، د ښځو پياوړتيا لپاره د دوی له لوري د شخصي کاروبارونو پيلول عمده لار ده او په خبره يې، د دوی له لوري پيل شوي واړه کاروبارونه په راتلونکې کې پر لویو هغو بدلېدای شي.
یوه بله متشبېثه ښځه وايي: « اوس مهال چې هېواد کې کوم وضعیت دی بیا هم د خوښۍ ځای دی چې ښځې کولی شي ښه په ارامه فضا کې شخصي کاروبار وکړي، ځکه امنیتي وضعیت ښه دی او اسلامي امارت له سوداګرو ښځو سره څه ستونزه نه لري. موږ له ډونرانو او موسسو غواړو چې له ښځو سره چې کومې مرستې کوي؛ هغه پیسې که کمې وي او که زیاتې باید وڅارل شي پر کاروبار یې ولګول شي.»
سوداګرې ښځې غوښتنه کوي، چې سرپرست حکومت دې د دوی د شخصې کارونو د ملاتړ ترڅنګ د دوی لاسي صنایعو ته بازار موندنه وکړي او په دې توګه دې کاروباري ښځې شخصي کاروبار پيلولو ته وهڅوي
