د سرپرست حکومت له څه باندې دوه نیم کلن حاکميت راهيسې اکثره هېوادونه او نړيوال سازمانونه په افغانستان کې د بشر حقونو او په ځانګړې توګه د نجونو او ښځو حقونو د نقض پرلپیسې ادعاوې کوي، خو سرپرست حکومت بيا د بشپړ وضاحت پر ځای يوازې د يادو ادعاوو پر ردولو تکيه کړې.
د ملګرو ملتونو د بشري حقونو سترې شورا ۵۵مې غونډې ګډونوالو هېوادونو په یوې ګډې اعلامیې کې یو ځل بیا په افغانستان کې له کار او زدهکړو د افغانو نجونو او مېرمنو پر منعه کولو اندېښنه ښودلې.
د اعلامیې له مخې، په ټولو برخو کې د نجونو او ښځو له فعال حضور پرته د افغانستان پرمختګ ناشونی دی او له سرپرست حکومته غوښتل شوي، چې د ښځو او نجونو حقونه تامین کړي.
د اعلامیې یوه برخه: « موږ له هېوادونو غواړو، چې د بشري جنایتونو د کنوانسيون په مذاکراتو کې د سېسټماټیک جنسي ځورونو پر موضوع مهم تمرکز ولري او په ځانګړي توګه له طالبانو وغوښتل شي، چې د بشري حقونو په برخه کې د ښځو او نجونو حقونه ورکړي، څو د دې هېواد په راتلونکې کې یې ونډه مالومه وي.»
بل خوا د سرپرست حکومت ویاند ذبیح الله مجاهد د ملګرو ملتونو د بشري حقونو سترې شورا د غړو هېودونو اعلامیې ته په غبرګون کې وایي، نړۍ باید په افغانستان کې اسلامي ارزښنونو ته درناوی وکړي او د افغانستان په کورنیو مسایلو کې لاسوهنه ونه کړي.
مجاهد زیاتوي: « د افغانستان اسلامي امارت دریځ ډېر روښانه دی، د بشر حقونه په افغانستان کې خوندي دي، هغه حقونه چې اسلامي شریعت انسان ته ورکړي اسلامي امارت هغه خپله وجیبه ګڼي او خپل فرض یې بولي چې هغه خلکو ته ورکړي. بله دا چې د نړۍ یا د ځېنو هېوادونو غوښتنې دا دي چې دوی غواړي په افغانستان کې هغه څه وي چې په غرب کې فرهنګ دی او د غرب غوښتنې دي، چې دا زموږ له فرهنګ سره توپیر لري. غربي ټولنه له یوه فرهنګه پيروي کوي، د ښځې او نر حقونه یو بولي؛ خو په اسلامي ټولنه او په ځانګړې توګه افغانستان کې بیا دا هر څه متفاوت دي، نو غرب دا بېلانس نه ساتي او نه دې اصل ته توجو کوي، بلکې د یوې پلمې په توګه د بشر د حقوقو موضوع مطرح کوي او په مکرر ډول تورونه پورې کوي چې دا هر څه بې ګټې دي.»
اخوا په جينوا کې د ملګرو ملتونو د بشري حقونو په شورا کې د افغانستان استازولۍ یو ځل بیا پر نړیوالې ټولنې غږ وکړ، چې په افغانستان کې د بشري حقونو په تېره د ښځو د وضعیت په اړه غږ پورته کړي.
د سیاسي چارو کارپوهان بیا وایي، د نجونو او ښځو کار او زدهکړه د افغانانو مشروع حق دي او باید تامین یې کړي.
د سیاسي چارو کارپوه محمد سلیم پیګیر وايي: « دا د افغانستان اسلامي امارت دنده ده چې هغه اندېښنې چې د بشر حقونو سازمان، د ملګرو ملتونو سازمان او همداراز د افغانستان خلک یې د ښوونځيو او پوهنتونونو په اړه لري؛ ژر تر ژره له منځه یوسې څو نور نو نړیواله ټولنه، د بشر حقونو سازمان او نړیوال سازمانونه پر موږ نیوکه ونه کړي.»
دا په داسې حال کې ده، چې تېره ورځ د اروپا پارلمان په افغانستان کې د اعدام له مجازاتو د مخنیوي او پر ښځو د لګول شویو محدودیتونو د لرې کېدو په تړاو یو پرېکړه لیک تصویب کړ. په یاد پریکړه لیک کې یې په افغانستان کې په بېلابېلو برخو کې د افغان نجونو او ښځو د مساوي مشارکت غوښتنه کړې.
