د افغانستان بهرنیو چارو وزارت سرپرست مولوي امیرخان متقي کابل کې د یوې ناستې پر مهال اندېښنه ښودلې وه، چې له نړۍ سره ټکر د افغانانو لپاره ښې پایلې نه لري.
امیرخان متقي ویلي، بهرنیو چارو وزارت نړۍ ته د افغانستان د ښه تصویر وړاندې کولو د دندې ترڅنګ، مکلف دی چې افغانستان نړۍ سره له ټکره وژغوري.
هغه زیاتوي: «د بهرنیو چارو وزارت د افغانستان او نړۍ د وصل کېدو مسوولیت لري او بالاخره افغانستان له هغه درانه او نه جبرانېدونکي ګواښه ژغوري چې هغه له نړۍ سره ټکر دی او په پایله کې یې د افغانانو دربدري ده.»
د سیاسي چارو کارپوهان وايي، له تېرو دوه نیمو کلونو راهیسې افغانستان له نړۍ سره په تقابل کې دی.
دوی وايي، دا چې افغانستان له نړۍ سره له ټکره وژغورل شي مهمه ده چې د نړۍ هغه مشروع غوښتنې چې له اسلامي ارزښتونو سره په تقابل کې نه دي او د افغان ولس له غوښتنو سره توپیر نه لري باید ومنل او عملي شي.
دغه راز دوی وايي، یوازې د نجونو زده کړو او د ښځو کار ته د اجازې ورکړه کولی شي چې د نړیوالو پلمې ورختمې کړي، افغانستان له نړۍ سره مثبت تعامل ته ورسوي او افغان لوری باید د خپل هېواد د ژغورلو لپاره په دغه برخه کې کوټلي ګامونه واخلي.
د سیاسي چارو کارپوه توریالی ځاځی وايي: « دا چې اوس د بهرنیو چارو وزارت ویلي دي چې موږ باید خپل هېواد له نړۍ سره له ټکره وژغورو، که غواړئ چې دا لویه قرباني او فداکارۍ ورکړئ؛ نو د نړۍ مشروع غوښتنې ومنئ ترڅو نړیوال له تاسې سره تعامل وکړي او دا هېواد او ولس له دغه ۴۵ کلنې غمیزې څخه وژغورل شي. ستاسې له راتګه تر نن ورځې خپله ولس، سیاسي شنونکي او نړیوال درته وايي، چې د ښوونځيو او پوهنتونونو دروازې خلاصې کړئ، ځکه له نړیوالو سره ستر ټکر دی؛ نو هیله کوو د نجونو ښوونځي او پوهنتونونه پرانیزئ او د مېرمنو د کار مساله حل کړئ.»
په ورته وخت کې امیر خان متقي وايي، د افغانستان متوازن او اقتصاد محوره بهرني سیاست له امله له سیمې سره تعامل زیات شوی او د نورو هېوادونو په پرتله د افغانستان په بازارونو کې د توکو بیو د راټیټېدو لامل هم همدغه مساله ده.
متقي زیاتوي: « په راروانو شپږو میاشتو کې به موږ او تاسې ډېر ښه ښه زیري واورو، ډېر ښه پرمختګونه به ووینو، ډېرې لویې لویې پروژې به پیل شي، هغه پروژې چې خلکو په خوب کې لیدلې او اوس په عمل کې پیلېږي دا ټول زموږ او ستاسې د ښه او متوازن سیاست او معتدلې پالیسۍ پایله ده، زموږ د هغه اقتصاد محوره پالیسۍ پایله ده چې موږ او تاسې نه غواړو له نورو هېوادونو سره په ټکر کې راشو.»
اسلامي امارت تل په دې ټينګار کوي چې له هېڅ هېواد سره تقابل نه غواړي او هیله لري چې له ټولو هېوادونو سره ښې نږدې او دوستانه اړیکې ولري او هغه ټولې اندېښنې بې ځایه ګڼي چې ګني له افغانستانه به نورو ته ګواښ پیښ شي.
