د بغلان معترض نوماندان وايي، اجرایه ریاست مشاورینو ټاکنو کې لاسوهنې کړي.
د اجرایه ریاست په ځینو مشاورینو تور پورې دی چې په بغلان کې یې د ولسي جرګې ټاکنو په مهال مصنوعي جګړه رامنځته کړې او د خپلو نوماندانو په ګټه یې کار کړی.
د بغلان معترض نوماندان له حکومت، ټاکنو او ټاکنیزو شکایتونو کمېسیون غواړي چې تورې رایې له سپینو جلا کړي او د ملت ارادې ته احترام وکړي.
معترض نوماندان وایي، که غوښتنې یې ونه منل شي د شمال او سویل لاره به وتړي او کابل ته راغلې برښنا به پرې کړي.
کابل ته له بغلان راغلي ځیني معترض نوماندان ادعا کوي چې د اجرایه ریاست ځینو مشاورینو هلته د خپلو نوماندانو په ګټه درغلي کړې ده.
که څه هم دوی د چا نوم ښکاره نه کړ، خو وایي د بغلان تاله او برفک ولسوالۍ کې د ټاکنو په مهال مصنوعي جګړه رامنځته شوه، خلک تېښتې ته اړ شول او صندقونه له بایو متریک پرته د ځانګړو نوماندانو په ګټه ډک شوي دي.
معترض نوماندان عبدالواحد ارمان، عبیدالله، حبیب الرحمن اندرابي او حامد پویا له حکومت، ټاکنو او ټاکنیزو شکایتونو کمېسیون غواړي چې درغلۍ په ګوته کړي، مجرمین مجازات کړي او د ملت له ارادې سره سم پارلمان رامنځته کړي.
ټاکنیزو شکایتونو کمېسیون ویلي یوازې هغه رایې دې حساب شي چې بایومتریک شوې وي، خو د ټاکنو کمېسیون بیا وایي، هغه رایې هم حسابوي چې درغلي په کې نه وي شوې او له بایو متریک پرته اچول شوي وي، ځکه دوی خلکو ته ویلي چې که بایو متریک کار نه کوي، نو د لیست مطابق دې خپلې رایې وکاروي.
