د ملي مصالحې مشر، ډاکټر عبدالله عبدالله نن کابل کې د خبرو په مهال وویل چې افغان حکومت به د سولې په برخه کې خپلو هڅو ته دوام ورکړي او له نړیوالې ټولنې سره په ګډه افغانستان کې د سولې او ثبات د راتګ لپاره کوښښونه روان دي.
هغه یو ځل بیا ټینګار کړی چې د افغان سولې په اړه سیمه ییزه او نړیواله اجماع را مینځته شوې ده، خو نړیوال د هغه سولې ملاتړ کوي چې دلته د لاس ته راوړنو د خوندیتوب سبب شي.
ډاکټر عبدالله عبدالله یو ځل بیا پر روان تاوتریخوالي اندېښنه ښودلې او په خبره یې طالبانو ته په کار ده چې تاوتریخوالی کم کړي او ژر تر ژره دایمي اوربند ته تیاری وښيي.
ډاکټر عبدالله همدا راز وايي چې نن به د افغان حکومت له مذاکراتي پلاوي سره لیده کاته ولري او پر شوو پرمختګونو او راتلونکو پلانونو به خبرې ورسره وکړي.
