ولسمشر اشرف غني وايي چې مخامخ جګړه کې له ماتې وروسته طالبانو ملکي وګړي او عامه تاسیسات هدف ګرځولي.
ولسمشر غني د کابل مرستیال والي وژنې ته په غبرګون ویلي، دا یو ترهګریز برید دی او طالبان نه شي کولی پر ملکي وګړو او عامه تاسیساتو د زیاتو شویو تروریستي بریدونو او چاودنو له مسوولیته خپلې اوږې سپکې کړي.
د کابل مرستیال والي محبوب الله محبي نن سهار د کابل ښار څلورم مکرویانو سیمه کې د مقناطیسي ماین چاودنه کې خپل ژوند بایلود.
ولسمشر وویل چې د هیواد کشفي ارګانونو یو شمېر ترهګر له چاودېدونکو توکو او وسلو سره نیولي او د نورو د موندلو او نیولو هڅې هم روانې دي چې د خپلو ناوړه اعمالو په سزا به ورسېږي.
