د هېواد د ملي امنیت شورا سلاکار حمد الله محب په خپل فیسبوک لیکلي، افغان حکومت چمتو دی چې د سولې پاتې پړاوونه افغانستان کې د ننه تعقیب کړي.
ښاغلي محب لیکلي، دولت د ځای په اړه ځانګړې ملاحظه نلري او چمتو دی د هیواد هره سیمه، چې طالبان پیشنهادوي هلته د تاسیساتو جوړولو په شمول، بشپړه امادګي ونیسي او خبرې پر مخ یوسي.
ښاغلي محب لیکي، د افغانستان دننه د سولي خبرې به ټولو ته د باور وړ ځانګړې امنیتي ساحه رامنځته او افغان ولس ته پر سوله او مذاکراتو د مالکیت او نظارت توان ورکړي.
د ملي امنیت شورا سلاکار زیاته کړې ده، مذاکره کوونکي به د خپلو هیوادوالو له کړاوونو او غوښتنو له نژدې او په بهتره توګه اګاه وی او په دې پروسه کې به د اضافي لګښتونو مخنیوی وشي.
د نوموړي په لیکنه، بهر کې سوله او سوله کوونکي د بیروني شرایطو څخه متاثره وي او تجربو ښوولې، چې دا ډول سوله افغاني ګټي نه تامینوي.
