ځايي سرچینې وايی، دغه ولسوالۍ کې له تیرې ورځې راهیسې جګړه روانه ده او یو شمېر سیمې طالبانو له حکومتي ځواکونو څخه نیولي دي.
د سرچینو په وینا، جګړه دامهال د دغې ولسوالۍ د ده لاهور اوناګهان سیمو کې روانه ده.
سرچینه زیاتوي، طالبان توانېدلي چې د ارغنداب ولسوالۍ چهارغولبه، تابین، کوهک، ترناوه، سیدانو کلاچه، لویه مناره او ژوندو هدیره سیمې له حکومتي ځواکونو څخه ونیسي.
تر دې دمه د دغې جګړې له امله د مرګ ژوبلې کره شمېر نه دی په ډاګه شوی.
ارغنداب ولسوالۍ کې یوه میاشت وړاندې هم ځینې سیمې طالبانو ونیولې، خو حکومتي ځواکونو سره تر یوې سختې جګړې وروسته طالبان په شاه شول.
