ولسمشر غني د افغانستان لپاره د جنیوا کنفرانس په څنډه کې، د سیمه ییزو همکاریو په ناسته کې وینا لرله او هغه فرصتونه یې په نښه کل، چې سیمه ییز اتصال یې رامنځته کولی شي.
ولسمشر د دې جملې په ویلو، چې خیرات نه غواړو اتصال وغواړو، افغانستان د داسې یو چاپېریال غوښتونکی یاد کړ، چې پانګونې ته مساعد او افغانانو سره هم اقتصادي وده کې مرسته وکړي.
ولسمشر وویل: ((موږ غواړو داسې یو چاپیریال رامنځته کړو، چې د سیمه ییز وصل او او پانګونې لپاره مساعد وي، او د افغانستان خلکو سره هم اقتصادي وده کې مرسته وکړي، موږ خیرات نه غواړو، بلکې موږ اتصال غواړو.))
ولسمشر غني افغانستان سره ګډ کار د سیمې د ثبات لپاره مهم یاد کړ، چې کولی شي ګاونډیو او نړیوالو ته متوجه ګواښ کم کړي.
ښاغلي غني وویل: ((موږ سره مرسته وکړئ چې د سیمې کاري اډانه پیاوړې کړو، چې سوله او سیاسي ثبات تضمین شي، سیمې ته د ترهګرو ډلو، جرمي شبکو او نور شته ګواښونه راکم شي.))
ولسمشر ډاډ ورکړ، چې افغان خاوره د چا پر ضد نه کاریږي او د افغانستان تاریخي حیثیت ته په لیدو، چې د سیمې د وصل دنده یې ترسره کړې، دوی هم دغه لرلید لري.
ولسمشر وایي:(( افغانستان په تاریخي ډول د سیمې د اتصال دنده ترسره کړې، افغانستان ته د اسیا زړه، د هند دروازه، د اسیا سویس زرلینډ او د اسیا څلور لارې ویل شوی، چې موږ هم دغه لرلید لرو.))
د ولسمشر غني په خبره، ګڼې ستونزې چې سیمه ورسره مخ ده، په ګډ کار او سیمه ییز اتصال حل کیدای شي.
