د افغانستان لپاره د جېنیوا ۲۰۲۰ کال کنفرانس نن پیل شو.
د کنفرانس په لومړۍ ورځ په دوو مهمو مسایلو ګډونوالو خبرې وکړې چې یوه یې سوله او بله یې د بشر د حقونو خوندیتوب وو.
د بهرنیو چارو وزیر چې دا کنفرانس یې رهبري کاوه وویل، ترهګري د ټولو لپاره یو ګواښ دی خو په وینا یې چې هېواد یې دې ته ژمن دی چې د څلورو لسیزو جنګ ته د پای ټکی کېږدي.
د بهرنیو چارو وزیر محمد حنیف اتمر وویل: ((ترهګري زموږ او نړیوالو ټولنې لپاره ګډ ګواښ دی او سوله د ټولو په ګټه ده. افغانستان ژمن دی چې په هېواد کې د څلورو لسيزوپای ته ورسوي.))
په دې کنفرانس کې دغه راز د ښځو او ماشومانو د حقونو په خوندیتوب هم ټینګار وشو.
د افغانستان د بشري حقونو خپلواک کمېسیون مشرې، آغلې شهرزاد اکبر وویل: ((د قربانیانو غږ بايد واوریدل شي، افغانستان مرکچي پلاوی بايد د ټولو غږ واوري. سوله هغه وخت ممکنه ده چې بشري حقونه پکې خوندي وي. د بشري حقونو اهمیت سولې ته رسېدو لپاره اړين ګڼل کېږي. د تاوتريخوالي پای ته رسېدل به ټول افغانان سولې ته هیله من کړي.))
د افغانستان د سولې مذاکره کوونکی پلاوی بیا وایي، تاوتریخوالي افغانان خفه کړي او خبرداری ورکوي چې نه پرېږدي تېر تاریخ تکرار شي.
د افغان حکومت مذاکره کوونکي پلاوي مشر معصوم ستانکزی وویل: ((افغانان هيله من ؤ چې د امريکا او طالبانو ترمنځ له هوکړې وروسته د تاوتریخوالي کچه کمه شي، خو له بده مرغه داسې ونه شول. موږ بايد د تېر تاريخ د تکرارېدو او د بد تصویر د رامنځته کېدو مخه ونيسو.))
ښاغلي ستانکزي دغه راز د ښځو په ونډې هم ټینګار وکړ او وې ویل، افغان مشران په ټولو برخو کې د ښځو ونډه مهمه ګڼي او له همدې امله د سولې په بهير کې افغان ښځې پراخ ګډون لري.
