د امریکايي رسنیو راپور له مخې، د امریکا دفاع وزارت سرپرست خپلو سرتېرو ته په ګوته کړې چې هڅه کوي د ولسمشر ټرمپ د ټاکنیز کمپاین ژمنې پوره کړي.
د سټار انډ سټرپس رسنۍ راپور له مخې، کریستوفر سي میلر ویلي، موخه یې عراق او افغانستان کې د سرتېرو د کمولو د بهیر څارل دي.
میلر ویلي، ” دا یو ډېر اساس پړاو دی چې په کې زموږ هڅې له رهبرۍ څخه حمایوي رول ته اوړي. موږ د نه ختمېدونکو جګړو خلک نه یو… ټولې جګړې باید پای ته ورسېږي.”
تر دي وړاندې واشنګټن پوسټ راپور ورکړی چې د دفاع وزارت پخواني وزیر ټرمپ ته د سرتېرو ژر اېستلو په تړاو خبرداری ورکړی و.
د واشنګټن پوسټ راپور له مخې، د امریکا پخواني دفاع وزیر مارک اېسپر ټرمپ ته په یوه لیک کې د سرتېرو ژر اېستلو په تړاو خپلې اندېښنې شریکې کړې وې.
اېسپر لیکلي، افغانستان کې وضعیت ښه نه دی او تاوتریخوالی لاهم زیات دی.
اېسپر همداراز د سرتېرو ژر اېستلو او شته ګواښونو په تړاو خبرداری ورکړی و.
د امریکايي چارواکو دغه څرګندونې داسې مهال کېږي چې د افغان سولې خبرو کې لا هم کوم پرمختګ نه دی رامنځته شوی.
دواړه لوري لا هم د مذکراتو پر اجنډا توافق نه دی کړی.
