اروپايي ټولنې له پاکستان سره په یوه ګډه اعلامیه کې په افغانستان کې د اوربند او مذاکراتو د چټکتیا غوښتنه کړې ده
په دې ګډه اعلامیه کې راغلي چې افغانستان کې جګړې خونړۍ شوی او ښکیلو لوریو ته پکار ده چې زر تر زره تاوتریخوالی کم او د سولې خبرې چټکې کړي.
دواړو لورو ویلي چې په افغانستان کې د افغانانو په مشرۍ او مالکیت د سولې له هر ډول خبرو ملاتړ کوي او ددې تمه لري چې په افغانستان کې د اوږدې جګړې د پای ته رسېدو سبب شي.
اروپايي ټولنې او پاکستان له دواړو لورو غوښتي چې د ملګرو ملتونو د بشري اوربند غوښتنه هم ومني او سولې ته د ژمنتیا د ښودلو لپاره دې دواړه لوري په رښتینې توګه تاوتریخوالی کم کړي او مذاکرات دې چټک کړي.
له دې سره د سعودي عربستان پادشا په مشرۍ د هغه هېواد د کابېنې غونډې د کابل پر پوهنتون برید وغندلو.
د کابېنې دا غونډه چې د ملک سلمان په مشرۍ جوړه شوې وه د کابل پوهنتون سربیره یې په افغانستان کې د تاوتریخوالي وروستۍ پېښې غندلي دي.
د سعودي عربستان پادشاه ملک سلمان ویلي، دوی په افغانستان کې روان تاوتریخوالی غندي او ټول هغه بریدونه چې عام وګړو ته په کې مرګ ژوبله اوړي د غندلو د ي.
د سعودي عربستان د پادشاه په مشرۍ د کابېنې داسې غونډه چې د افغانستان تاوتریخوالی په کې غندل کیږي له نادرو او کم سارو هغو ده.
د کابل پر پوهنتون د تیرې دوشنبې ورځې برید چې له څلویښتو زیاتو محصلینو ته په کې مرګ ژوبله واوښته، په کور د ننه او بیرون یې توند غبرګونونه راپارولي دي.
