د قطر په پلازمېنه دوحه کې د ملګرو ملتونو په نوښت د افغانستان په اړه دوه ورځنۍ ناسته پای ته ورسېده.
که څه هم ياده ناسته د بندو دروازو تر شا ترسره شوه، خو د ملګرو ملتونو سرمنشي انټونیوګوتېریش يې جزئيات په يوه خبري کنفرانس کې له رسنيو سره شريک کړل.
ګوتېریش وايي، ياده دوه ورځنۍ ناسته مثبته وه او په کې د ګډونوالو له لوري په افغانستان کې د ترهګرۍ ګواښونو کمولو په شمول پر درېيوعمده مسايلو بحثونه شوي.
ګوټېريش د ترهګرۍ له امله د احتمالي ګواښونو کمول مهم بولي او زياتوي، چې ياد ګواښونه د افغانستان پر ګاونډي هېوادونو هم اغېز کولی شي.
نوموړي دغه راز ویلي، د ناستې ګډونوالو په افغانستان کې د يوه داسې حکومت پر رامنځته کولو ټينګار کړی، چې د ټولو قومونو په شمول د افغاني ټولنې بېلابېل اقشار په کې شامل وي.
ګوټېريش د بشري حقونو او په ځانګړې توګه د نجونو او ښځو حقونو تحقق هم د دوحې د دوې ورځنۍ ناستې د بحث عمده ټکی ياد کړ.
هغه زیاته کړې: « افغانستان په يوه داسې وضعيت کې پاتې شوی، چې حکومت يې په رسميت نه دی پېژندل شوی. طالبان فکر کوي، چې د نړيوالو انديښنې د دوی مسووليت نه دی، خو نړيواله ټولنه فکر کوي، چې پرمختګ نشته. دا د رسميت او تعامل په برخه کې مهم مطرح مسايل دي.»
له خپرو شوو راپورونو سره سم په دې ناسته کې د افغانستان لپاره د ملګرو ملتونو د يوه ځانګړي استازي پر ټاکلو هم بحث شوی دی.
ګوتېریش وايي، د ياد استازي د رول څرنګوالي په اړه يې د افغانستان له سرپرست حکومت سره خبرې شوي او دغه راز د دوحې په ناسته کې په دې اړه شوې سلا مشورې به د ملګرو ملتونو امنيت شورا ته وړاندې کړي.
هغه زیاتوي: «د ځانګړي استازي په اړه به امنيت شورا ته د دوحې په ناسته کې شوې مشورې وړاندې کړم. د ياد استازي ګومارل مهم دي. دا استازی نه دا چې د نړيوالې همغږۍ مسووليت لري، بلکې له طالبانو سره به هم دخيل وي.»
ګوتېریش د يوې پوښتنې په ځواب کې د دوحې په ناسته کې د افغانستان سرپرست حکومت نه ګډون ته هم اشارې کړې او وايي، د افغانستان حکومت خپل ګډون له يو لړ داسې شرطونو سره ضميمه کړی و، چې ملګرو ملتونو ته د منلو نه وو.
ګوټېريش که څه هم ياد شرطونه واضح نه کړل خو وايي، د افغاني ټولنې د نورو اقشارو د استازو نه ګډون او بحث ورسره نه کول، يو له هغو شرطونو وو، چې سرپرست حکومت په ياده ناسته کې د ګډون لپاره اېښي وه.
دغه راز ګوتېریش یو وار بیا له نجونو او مېرمنو سره خواخوږي څرګنده کړه او د دوی پر وړاندې يې د ټولو محدوديتونو د لرې کېدو غوښتنه وکړه.
هغه وايي: « زما پيغام له دوی سره خواږي ده، که زما هېواد کې زما لسمۍ ښوونځيو ته نه شي تللی او يا هم په ټولنه او اقتصاد کې يې ونډه ونه لري، نو دا به له زيانه خالي نه وي.»
که څه هم د دوحې په تازه ترسره شوې ناسته کې د افغانستان سرپرست حکومت ګډون نه درلود، خو انټونيو ګوټېريش تائيدوي، چې له غونډې وړاندې يې په دوحې کې د سياسي دفتر له ځينو غړو سره ليدلي او په افغانستان کې يې د موجوده وضعيت په تړاو ورسره خبرې کړي دي.
