ټاکل شوې چې سبا دوشنبه د مصالحې عالي شورا مشر عبدالله عبدالله اسلام اباد ته سفر وکړي.
قطر کې د سولې خبرو سره هم مهاله په سیمه ییزه کچه د ملاتړ ترلاسه کولو، په تېره بیا د افغانستان او پاکستان د اړیکو ښه کولو لپاره هڅې روانې دي.
له عبدالله عبدالله سره به په دغه رسمي سفر کې یو پلاوی هم ګډون ولري چې له پاکستان چارواکو سره د نورو موضوعاتو ترڅنګ پر دوه اړخیزو همکاریو خبرې وشي.
دغه راز تمه ده چې د پاکستان لومړی وزیر عمران خان به هم په نږدې راتلونکي کې کابل ته رسمي سفر وکړي.
عمران خان د جمعې په ورځ ولسمشر محمد اشرف غني سره د ټیلیفوني خبرو پر مهال افغانستان کې د اوربند ملاتړ څرګند کړی و.
له دې سره د افغان حکومت او طالبانو د تماس ډلې په اتلس مواردو هوکړې ته رسیدلي دي.
د مذاکراتي پلاوي غړی نادر نادري وایي، دوی د عمومي مجلس لپاره چمتو دي، خو د طالبانو خپلمنځي بحثونه ځنډني دي چې خبرې يې هم ځنډنۍ کړي دي.
له قطر مالومات دا دي، چې طالبان له امریکا سره په شوې هوکړه کې ځینې موارد حیثیتي بولي او بیا یې پرې بحثونه پيل کړي دي.
همدا تیره شپه د مصالحې عالي شورا مشر عبدالله عبدالله دوحه کې د افغان دولت مذاکره کوونکي پلاوي سره د ویډیو کنفرانس له لارې خبرې کړي، خو د خبرو جزیات لا نه دي شریک شوي.
له دې سره کورنیو چارو وزارت وايي، د جګړې د شدت لامل هغه پنځه زره خطرناک طالب جنګیالي دي چې له خوشې کېدو وروسته یې بیرته جګړه پیل کړې.
د کورنیو چارو وزارت مهم چارواکي چې مشرانو جرګې ورغوښتي وو ویلي، چې پنځه زره خوشې شوي طالبان هیڅ یو یې په کور نه دی ناست او ټولو پر افغان ځواکونو بریدونه پيل کړي.
د مشرانو جرګې دفاعي کمېسیون کې د کورنیو چارو وزارت مسوولینو ویلي، طالبانو په مذاکراتو کې د امتیاز اخیستو لپاره جګړه زیاته کړې ده.
د طالبانو مذاکراتي پلاوي غړي ملا خیرالله خیر خواه ویلي، د افغان دولت مذاکراتي پلاوی داسې مسایل له رسنیو سره شریکوي چې لا پرې هوکړه نه وي شوې.
خیر خواه ویلي، داسې ښکاري چې مقابل لوری قصداً په دې خبرو کې خنډونه رامنځته کوي او غواړي چې دا پروسه وځنډوي.
هغه له نن ټکي اسیا خپرونې سره په مرکه کې ویلي، د بین الافغاني مذاکراتو د طرز العمل جوړولو کې د اختلاف دوه اساسي ټکي دي چې د طالبانو او امریکا ترمنځ خپلمنځي هوکړه د روانو بین الافغاني مذاکراتو لپاره اساس دی، خو د افغان دولت پلاوی ټینګار کوي چې په دې مذاکراتو کې باید هغه تړون ته اشاره ونشي.
ملا خیرالله ویلي، که چېرې مقابل لوری دا اساسي ټکی نه مني چې دوحه کې روان مذاکرات د طالبانو او امریکا د تړون بر بنسټ کېږي، نو بیا خبرو ته هېڅ اړتیا نشته.
دویم اختلافي ټکی دا دی چې طالبان غواړي که چېرته د مذاکراتو پر مهال کوم اختلاف یا د نظر توپیر رامنځته کېږي، نو باید د حل لپاره یې حنفي مذهب ته رجوع وشي، خو هغه ویلي چې، د افغان دولت مرکچي پلاوي شیعه مذهبه غړي غواړي چې په دې برخه کې جعفري فقهې یادونه هم وشي.
طالبان وایي، حنفي مذهب له پېړیو راهیسې افغانستان کې شته، او روانو مذاکراتو کې پر دې مذهب د دوی ټینګار یوازې تر همدې مذاکراتو محدود دی.
