وسله والو د اروزګان په ګېزاب ولسوالۍ کې ۲۸ تسلیم شوي سرتېري وژلي.
د اروزګان د والي ویاند زړګی عبادي وايي، دغه سرتېري، چې له څو ورځو راهیسې د وسله والو په سخته محاصره کې وو، وسله والو ورسره ژمنه کړې وه، چې تر تسلیم کېدو وروسته به ورته زیان نه رسوي، خو ژمنه یې نه ده پوره کړې او ۲۸سرتېري يې وژلي دي.
له تېرو شپږو ورځو راهیسې دغه ولسوالۍ کې طالب وسله والو پر امنیتي پوستو بریدونه پیل کړي، چې د ولسوالۍ ګڼې سيمې د طالب وسله والو نيولي دي.
یوه بله سرچینه چې نه غواړي نوم يې خپور شي وايي، د ولسوالۍ او امنیه قوماندانۍ ودانۍ د وسله والو له ورې محاصره شوي هم دي.
د سرچینې په خبره، د یادې جګړې په اوږدو کې تر سلو ډېر سرتېري وژل شوي او یو شمېر نور یې ورک دي.
که څه هم یادې ولسوالۍ ته له مرکز ترینکوټ څخه یو شمېر مرستندویه سرتېري ليږل شوي، خو محاصره سرتېري وايي، جګړه سخته ده او که زیاته مرسته ورته ونه رسېږي ولسوالۍ به سقوط شي.
