له پاکستانه په جبر را اېستل شوي افغانان وايي، په پاکستان کې ترې زدهکړې نیمګړې پاتې شوي او غواړي چې په راستنېدو سره یې په کور دننه د زده کړو زمینه ورته برابره شي.
راستانه شوي هېوادوال هېله لري، چې زده کړې ترلاسه کړي او له دې لارې هېواد ته خدمت وکړي.
د دوی په خبره؛ حکومت دې ورته په هغو ټولګیو کې د زده کړو زمینه برابره کړي؛ په کومو کې چې د بېرته راستنېدو پر مهال ترې زده کړې نیمګړې پاتې شوي.
له پاکستانه راستون شوی یو زدهکوونکی وايي: « موږ ته دې دلته د زده کړو زمینه برابره شي، څو خپلو زده کړو ته دوام ورکړو او په راتلونکې کې خپلو هېلو ته ورسېږو او خپل وطن ته خدمت وکړو، د خپل وطن نوم روښانه کړو، دا به موږ ته ډېره ښه وي خو چې اسانتیاوې ولرو او زده کړو ته لاسرسی ولرو هرو مرو خپلو هېلو ته رسېږو.»
د ډېری راستنو شویو افغانانو اقتصاد ډېر کمزوری دی او دلته د کار نشتوالي او سرپناه په برخه له ستونزو سره مخ دي.
دوی وايي، حکومت دې ورته د دایمي سرپناه ترڅنګ د کار روزګار زمینه هم برابره کړي.
له پاکستانه راستون شوی یو تن وايي:« موږ ته دې د موسسو له لارې پور راکړي یا دې د یوه کار زمینه راته برابره کړي، چې موږ خپله خواري او مزدوري وکړو. زه خو دلته هېڅ نه لرم، د یوه قدم په اندازه ځمکه هم نه لرم او داسې په خپل وطن کې کډوال یمه.»
بل پلو مرستندویه ادارو او حکومت له راستنو شویو کورنيو سره د نغدي مرستو ترڅنګ د لنډمهالې سرپناه او د لومړنیو توکو مرستې هم کړي.
چارواکي وايي، حکومت ژمن دی، چې له ګاونډیو هېوادونو راستنو شویو کورنیو ته به د دایمي سرپناه ترڅنګ د کار روزګار او د دیني او عصري زدهکړو زمینه هم برابره کړي.
د کډوالو او راستنېدونکو چارو سرپرست وزیر خلیلالرحمن حقاني وايي: « دا زموږ مسوولیت دی، دوی زموږ اولادونه دي او زده کړې د دوی حق دی چې باید ترلاسه یې کړي. موږ ورته باید د زده کړو ښه زمینه برابره کړو، ځکه د دوی د زده کړو او راتلونکې ژوند په اړه مسوول یو.»
د حکومت د مالوماتو له مخې، له تېرو څو میاشتو راهیسې له ګاونډیو هېوادونو او په ځانګړي ډول له ایران او پاکستانه څه د پاسه یو میلیون افغان کډوال هېواد ته راستانه شوي، چې شاوخوا ۷۰۰ زره یې له پاکستانه په جبري ډول را اېستل شوي.
