د خوست اوسېدونکي مرکز او ولسوالیو کې د هدفي وژنو او بمي چاودنو له ډېرېدو شکایت کوي.
خوست د هېواد د سوېل ختیځې څنډې تر ټولو ارامه ولایت وه، خو اوس په کې ورځې تر بلې د ناامنۍ پېښې په ډېرېدو دي.
د خوست اوسېدونکو له شمشاد سره خبرو کې وویل چې له دوه میاشتو راهیسې د خوست په مرکز او ولسوالیو کې هدفي وژنې، بمي چاودنې او وسله وال بریدونه ډېر شوي او که پر وخت یې مخنیوی ونه شي، ناوړه اغیزې به یې پر څېرمه ولایتونو هم راپرېوځي.
د خوست امنیه قوماندان مل پاسوال غلام داوود تره خیل هم مني چې د نورو ولایتونو په څیر په روان کال کې په دغه ولایت کې هم د ناامنۍ ېیښې او په ځانګړي ډول بمي چاودنې زیاتې شوې دي، خو نوموړی وایي چې په ټول توان یې د مخنیوي هڅې پیل کړې دي.
تره خیل زیاتوي چې د موسی خیلو په ګډون یې ځینو نورو ولسوالیو ته یې اکمالات کړي او اضافي سرتیري یې هم لېږلي دي.
د خوست د ۱۲ ولسوالیو له ډلې، قلندر، سپیره صبریو او موسی خیلو ولسوالۍ له کلونو راهیسې ناامنه دي او خلک نیوکه کوي چې امنیتي ځواکونه یې د امنیت په ټینګښت کې پاتې راغلي.
