په قطر کې د لومړۍ بین الافغاني ناستې یو ویناوال د حکومت د مصالحې شورا مشر وو چې تر ډېره یې وینا په یووالي ور ټوله وه.
عبدالله عبدالله روانو جګړو ته په اشارې په اوربند ټينګار درلود او د امریکا او طالبانو له هوکړه لیک وروسته یې د جګړې زیانونه یاد کړل.
عبدالله وویل: ((له هغه وخته چې د امریکا او طالبانو تر منځ د سولې هوکړه لیک لاسلیک شوې، له خلکو سره د سولې هیلې را پيدا شوې دي، خو له بده مرغه له هغه وخت تر نن ورځې پورې په دې جګړه کې څه د پاسه دولس زره افغانان وژل شوي او له پنځلس زرو ډير ټپيان دي.))
د مصالحې شورا مشر د مذاکراتو په پرانیست غونډه کې دغه راز له طالب پلاوي وغوښتل، چې د داسې نظام په ټينګښت کې ورسره مرسته وکړي چې په اساسي قانون ولاړ وي او د ټولو خواوو حقونه په کې خوندي شوي وي.
عبدالله وویل: ((که باعزته او تل پاتې سوله راوړو، د خپل هېواد استقلال، ازادي، ملي حاکمیت، ځمکنۍ بشپړتیا وساتو، که چیرې د اسلام دین سره سم ولسواکه او ټول شموله نظام چې په اساسي قانون ولاړ وي ټيڼګ کړو، چې په کې د ټولو حقونه خوندي وي، نو موږ دواړه لوري به اتلان یو.))
د عبدالله ټينګار دا وه چې په سپيڅلي نیت راوتلي او د ولس له هغې غوښتنې سره راغلي چې موخه یې له سیاسي لارې د هر ډول جګړې او تاوتریخوالي پایته رسېدل دي.
هغه وویل: ((مونږ په هېواد کې د څلویښت کلنې وینې بهېدو درېدلو او سرتاسري سولې د ټينګښت په موخه د طالبانو له تحریک سره د صادقانه مذاکراتو په هدف له پاک نیت سره راغلي یو. زمونږ د خلکو مشروع غوښتنه او د سولې هدف دا دی چې له سیاسي لارې جګړه او تاوتریخوالی پای ته ورسېږي.))
د مصالحې شورا مشر ټينګاردا هم وو چې روانه جګړه د جنګ له لارې ګټونکې نلري او د ملت له ارادي سره سمه سیاسي حل لاره بیا هېڅ بایلونکی نلري.
