طالبانو سره مذاکرات د تسلیمۍ په ما نا نه بلکې هغوی ته ښودل دي چې څه غواړي.
د ولسمشر لومړي مرستیال امرا الله صالح د شهید اووني په مناسبت جوړو شویو مراسمو کې طالبانو ته په خطاب کې وویل، که دوی په ولس کې رېښې لري نو را دې شي او د ټاکنو له لارې دې ثابته کړي.
صالح د شهید اوونۍ په پلمه واټونو کې ګرځیدونکي اشخاص کوڅه ډبي یاد کړل او دا ډول حرکات یې د مسعود د لارې مخالفین وبلل.
صالح وویل، څومره چې دا ورځ په شرافت جوړه شي په همغه کچه به د شهیدانو روح ته درناوی شوی وي.
له دې سره د مصالحې عالي شورا مشر ډاکټر عبدالله عبدالله د جهاد او مقاومت په نوم جوړ شوي څلي ته د ګلونو ګیډې کېښودې.
د شهید اوونۍ په مناسبت په همدې موخه رسمي مراسم جوړ شوي و او ډاکټر عبدالله عبدالله وویل، سږکال دا ورځ په داسې حال کې نمانځي چې د سولې خبرې هم پیلیدونکي دي.
ښاغلي عبدالله د سولې بین الافغاني مذاکراتو پيل ته په اشا رې وویل ، خبرې زر پيلیدونکي دي.
قطر کې د طالبانو سیاسي دفتر ويلي، لاهم د افغان دولت لخوا د بندیانو خوشې کولو بهیر نه دی بشپړ شوی او دوی به هله مذاکرات پیل کړي چې پاتې شپږ طالب بندیان هم ازاد شي.
د طالبانو د قطر دفتر ویاند محمد نعیم وردګ ويلي، د بندیانو بهیر بشپړولو باندې کار روان دی او کله چې دغه بهیر بشپړ شي، دوی به خبرې پیل کړي.
د فرانسې او استرالیا هېوادونو د شپږو طالب بندیانو په خوشې کېدو نیوکه کوله، خو وروسته پرېکړه وشوه چې دا بندیان به قطر ته ولېږدول شي اما طالبان قطر ته د همدې بندیانو د رسېدو انتظار کوي.
د ارګ ویاند صدیق صدیقي ویلي، افغان پلاوی پوره تیاری لري چې خبرې پیل شي او په وینا یې طالبانو ته پکار ده چې تیاری ونیسي.
