نن له غرمې مخکې د عاشورا مراسمو او د سولې مشورتي لویې جرګې د بریالي ترسره کېدو له امله د کابل امنیتي ټیم د قدردانۍ په مناسبت یوه غونډه جوړه شوه.
په دغه غونډه کې د ولسمشر لومړي مرستیال امرالله صالح وویل چې هېڅوک د قانون څخه لوړ نه دي او باید د هغو خلکو مخنیوی وشي چې خلک ځوروي.
د ولسمشر لومړي مرستیال دغه راز وویل، د وږي اتلسمه د قانون ماتولو، د زور ښودلو او په سړکونو او واټونو د وسلو ګرځولو نه، بلکې د احمد شاه مسعود د شهادت ورځ ده.
هغه زیاته کړه چې د خلکو ځوروونکي په هېڅ قوم او فکري جریان پورې اړه نه لري او د وږي اتلسمه باید په عزت، وقار او شرافت ونمانځل شي، نه دا چې په هوایي ډزو او نفرت خورولو سره د خلکو د ځورونې لامل شي.
ښاغلي صالح دا هم وویل چې د کابل ښار په ټولو ناحیو کې د امنیتي میثاق برنامې له لارې د خلکو د امنیت تامین لپاره اقدامات کېږي او اړوندو ارګانونه به د امنیتي پېښو ریښې تشخیص کړي.
لومړي مرستیال همدا شان وویل: ((موږ باید د افغانستان هغو نجونو او ښځو ته چې لوړې زده کړې لري، د پولیسو لیکو کې د جذب زمینه برابره کړو او په دې کار سره د جرم ساحه محدوده کړو.))
