ولسمشر غني د سولې په تړاو ډېر فرصوته په لوی لاس له لاسه ورکړي او د سولې لپاره اراده نه لري.
د سولې شورا پخواني مشر کریم خلیلي ویلي، طالبان لا پخوا د سولې خبرو ته چمتو وو، خو ولسمشر غني چمتوالی نه درلود.
کریم خلیلي، په کابل کې د عاشورا په مناسبت یوې غونډې ته په وینا کې ویلي، د سولې لپاره اوسنی رامنځته شوی فرصت باید ضایع نه شي.
خلیلي ویلي، کله چې دی د سولې شورا مشر و په خپله یې د طالبانو مشر هبة الله اخندزاده ته لیک استولی او د لیک ځواب یې هم تر لاسه کړی و.
هغه ویلي، د طالبانو یو مذاکراتي پلاوي په هلمند ولایت کې له دوی سره مخامخ خبرو ته چمتوالی هم وښود، خو په خبره یې ولسمشر غني ورته ویلي چې اوسمهال مذاکراتو ته هیڅ ډول تیاری نه لري.
خلیلي دا هم ویلي، چې دوی د خپل کار په موده کې درې ځلې له طالبانو سره د تاوتریخوالي کمیدو په اړه ناسته وکړه او ولسمشر غني هم په انلاین ډول له دوی سره خبرې وکړي، خو په وینا یې ولسمشر له یادو فرصتونو ګټه پورته نه کړه.
