د افغانستان په ۱۲ ولايتونو کې وروستيو سېلابونو له امله ۱۵۱ تنه مړه او ۲۰۰ نور ټپيان شوي دي
طبیعي پېښو ته د رسیدنې په چارو کې د دولت وزارت مرستیال، محمد قاسم حیدري وايي، له تېرو دوو ورځو راهیسې د سختو سېلابونو له امله ۱۵۱ تنه مړه شوي او ۲۰۰ نور ټپیان دي.
حیدري وايي، دا سیلابونه په پروان، کاپیسا، کابل، ميدان وردک، پنجشېر، ننګرهار، لوګر، پکتیا، پکتیکا، نورستان، لغمان او خوست ولايتونو کې راوتي دي.
د تازه مالوماتو له مخې په دغو سیلابونو کې ۱۵۰۰ کورونه ویجاړ شوي او ۱۱۵۰ جریبه کرنیزه ځمکه او باغونه هم تخریب شوي دي.
د سر تر ټولو زیات زیان پروان ، کاپيسا، میدان وردګ او کابل سروبي ولسوالۍ کې اوښتې ده
له دې سره ولسمشر په هېواد کې د وروستیو سیلابونو له ځپل شوو کورنیو سره د بېړنیو مرستو ژمنه کړې ده.
نوموړي پرون ناوخته د ویډیو کنفرانس له لارې د پروان ولایت له ځايي چارواکو او قومي مشرانو سره خبرې کړې دي او دوی ته یې ډاډ ورکړی دی چې ژر تر ژره به حکومت له دوی سره ټولې اړینې مرستې وکړي.
نوموړي همدا راز د امرالله صالح په مشرۍ د پروان ولایت لپاره د مرستو یو کمیسیون جوړ کړی دی چې دوی به د ارګ د عملیاتي ادارې او مالیې وزارت په همغږۍ په پروان کې د ویجاړو شوو عامه تاسیساتو د جوړولو لپاره کار کوي.
ولسمشر غني همدا راز له ټولو امنیتي او دفاعي ځواکونو غوښتنه کړې چې د پروان له خلکو سره دې هر اړخیزه همکاري وکړي او د امنیت په تامین کې دې خپلې هڅې ډېرې کړي.
