د غزني په مالستان او جاغوري ولسواليو کې د کندهار پنځه اوسېدونکي تښتول شوي دي.
تښتول شوي کسان د کندهار د سپین بولدک ولسوالۍ موټر چلوونکي دي چې تېره ورځ د غزني په مالیستان او جاغوري ولسوالیو کې له خپلو موټرو سره یو ځای نامالوم لورې ته تښتول شوي دي.
د یادې ولسوالۍ قومي مشران وايي، دغه موټر چلوونکي د علیپور ملېشو له لورې تښتول شوي، چې له ډلې يې یو موټر چلوونکی وژل شوی هم دی.
د سپین بولدک قومي مشران له حکومت غوښتنه کوي، چې د یادو کسانو د برخليک په اړه دې ژر تر ژره اقدام وکړي.
عليپور د نامسؤوله وسله والو قوماندان دی چې تر دې وړاندې د افغان حکومت لخوا په کابل کې نیول شوی و.
تر دې وړاندې علیپور د افغان چارواکو په ضمانت خوشې شوی دی.
