طالبانو ارزګان کې حکیم شجاعي ټپي او مرستیال یې وژلی.
د مشرانو جرګې د شکایت اورېدو کمېسون مشر محمد حنیف حنیفي وايي، تېره ورځ د خاص ارزګان ولسوالی کُندلانو سیمه کې د یوې غېر مسووله وسله والې ډلې قومندان حکیم شجاعي د ملکیانو په کورونو بریدونه کړي چي رامنځ ته شوې جګړه کې ۷ غېر مسووله وسله وال وژل شوي او ۷ نور ټپیان شوي دي.
جګړه هغه وخت رامنځ ته شوې چي له کُندلانو سیمي یوه ښځه د حسیني سیمي ته تښتېدلې وه چي د کورنۍ غړو نوموړې ښځه بیا ځلي خپل سیمي ته را وستلې چې ورسره سم د شجاعي کسانو په دې کلي برید کړی او جګړه رامنځ ته شوې ده.
د سیمي خلکو د وسله والو طالبانو په ملاتړ د شجاعي له غېر مسووله وسله والې ډلې سره جګړه پېل کړې چي تر دې مهاله په کې د شجاعي د مرستیال فکور په ګډون ۷ غېر مسووله وسله وال وژل شوي او جګړه لا هم روانه ده.
یادي دواړې سیمي د حکومت له حاکمیت نه وتلي دي.
د خاص ارزګان ولسوالۍ څخه یوې امنیتي باوري سرچینې شمشاد ته وویل چې دغه جګړه کې تر اوسه ۲۲ ملکیان هم وژل شوي چې ښځې او ماشومان په کي شامل دي.
یوه بله سرچینه بیا وايي، خپله شجاعي هم دغو نښتو کي ټپي شوی.
د ارزګان ولایتي شورا یو غړی عبدال حقبین بیا وايي چي تر اوسه له یادو سیمو سلګونه کورنۍ کډه شوي او ۱۵ ملکیان هم وژل شوي.
د ارزګان والي پېښه مني خو وايي کره مالومات نه لري.
سویل کي د ۲۰۵ اتل قول اردو او نور امنیتي مسوولین بیا په دې تړاو ناخبري ښيي.
حکیم شجاعي کلونه وړاندې خاص ارزګان ولسوالۍ کي د بهرنیانو په مرسته د سیمه ییزو پولیسو لیکو کې پیاوړی قومندان و چې د مالوماتو له مخې هغه مهال یې ۱۲۰ بېګناه ملکیان وژلي و چې تراوسه یې حکومت نیولو کې اقدام هم نه دی کړی.
وسله وال طالبان بیا وايي، شجاعي په دوی بریدو کړی چې متقابل ځواب کي یې د شجاعي ۸ کسان مړه او ټپیان شوي او ۵ تنه یې ژوندي نیولي دي.
