د افغانستان دفاع وزارت مرستیال ویاند فواد امان د پاکستان پوځ هغه څرګندونې رد کړې چې ګنې د پاکستان مخالفې وسله والې ډلې له افغانستانه خپل فعالیتونه تنظیموي.
فواد امان په یوه تازه مرکه کې ویلی، چې د پاکستاني پوځ وروستۍ څرګندونې بې اساسه دي.
د نوموړي په خبره، ټولې نړۍ ته څرګنده ده، چې پاکستان کې د ترهګرو روزنځایونه او پټنځایونه دي خو به خبره یې اوس دوی هڅه کوي د نړیوالو په سترګو کې خاوره وشیندي.
د دفاع وزارت مرستیال ویاند زیاته کړې چې افغان امنیتي او دفاعي ځواکونه هېڅ یوې ډلې ته په افغانستان کې د نورو هېوادونو پر ضد د فعالیت اجازه نه ورکوي.
د پاکستان پوځ ادعا کړې ده، چې د جماعت الاحرار ډله بېرته د پاکستاني طالبانو له تحریک سره یو ځای شوې او دواړه ډلې په افغانستان کې پلانونه جوړوي او وروسته یې په پاکستان کې عملي کوي.
