ولسمشر محمد اشرف غني د اسد د ۲۶ مې د ځوانانو نړیوالې ورځې په نمانځغونډه کې ویلي، د اړتیا په صورت کې به د ملي اردو د پیاوړي کولو لپاره د هېواد پراختیايي بودیجه هم وکاروي.
.ارګ په یوې مطبوعاتي اعلامیه کې د ولسمشر له قوله لیکلي، نړۍ باید زموږ منندویه اوسي، ځکه زموږ ملت تروریزم سره د مبارزې په برخه کې زیاته قرباني ورکړې ده. هغه ټینګار وکړ چې افغانستان د جګړې او سیمه ییزو رقابتونو ډګر نشي پاتې کېدای.
ولسمشر زیاته کړې، سوله د افغانانو لومړیتوب دی، او موږ هم باید اقتصاد، د کورونا پر وړاندې مبارزه، بدلون، حکومتداري او د قانون حاکمیت اداره کړو.
ولسمشر دغه راز وایي، ((دا چې سوله غواړو، زموږ نېکه اراده او نیت دی، مګر موږ ماته نه ده خوړلې. د جمهوریت د تحیکم بنسټ ایښودل شوی دی او دغه مراسم د جمهوریت د استحکام استازیتوب کوي.))
ارګ وايي چې ولسمشر محمداشرف غني په ټینګار سره ویلي دي، ((موږ باید د یو بل په منلو سره یوه بل ته لاسونه ورکړو او په واحد صف کې د جمهوریت ملاتړ وکړو. که اړتیا شوه سړک نه جوړوو، اما زموږ امنیتي او دفاعي قواوې وږې نه پاتې کېږي.))
