د کندهار په سپین بولدک ولسوالۍ کې د تېرې جګړې د وژل شویو په یاد، په همدې ولسوالۍ کې پوځي تمرینات پیل شوي دي.
په دغه تمریناتو کې د هېواد لوی درستیز او ورسره راغلي نظامي پلاوي هم ګډون کړی دی.
دغه پوځي تمرینات په دریو برخو کې ترتیب شوي، چې هوايي، توپچي او پلي ځواکونو پوځي مانورونه هم په کې شامل دي.
د مسوولینو په خبره، له دغو پوځي تمریناتو یې موخه د افغان ځواکونو ستاینه او هڅونه ده.
څو اوونۍ وړاندې د کندهار سپین بولدک- چمن پر دروازه وروسته له هغې د افغان سرحدي او پاکستاني ملېشو تر منځ جګړه وشوه، چې کله پاکستاني ملېشو د کرښې هاخوا پر بند پاتې مسافرو ډزې وکړې.
د راپورونو له مخې، د جګړې پر مهال د پاکستاني له لوري په راتوغول شویو توغندیو کې ۲۸ کسان وژل شوي او تر ۸۰ زیات نور ټپيان شوي وو.
