د جنورۍ ۲۴ مه د زده کړو نړیواله ورځ ده. په افغانستان کې د ملګرو ملتونو سیاسي استازوالۍ (یوناما) مشرې روزا اوتنبایوا د زده کړونړیوالې ورځې په مناسبت ویلي، زده کړې اړتیا ده او هېڅوک باید له دغه اساسي حقه محروم نه شي.
هغې زیاته کړه:« نن د ښوونې او روزنې نړیوالې ورځې مبارکي وایم، ځکه چې دوامدارې سولې ته د رسېدو لپاره زده کړې یو اهمیت او مهم فرصت دی، زده کړه د افغانستان ټولو قشرونو نجونو، هلکانو او مېرمنو لپاره یوه مهمه اړتیا ده. افغانستان په تاريخي لحاظ نامتو څېرې لرلې او زده کړه د افغانستان په راتلونکي هر اړخیزه مثبته اغېزه لري، ځکه اقتصادي وده او نورو برخو کې پرمختګ له زده کړو پرته ناشونی دی»
اوتنبایو دا څرګندونې په داسې حال کې کوي چې، د ملګرو ملتونو د کډوالۍ سازمان د زدکړو پر ارزښت ټینګار کړی او ډاډ یې ورکړی چې په دې برخه کې د افغان نجونو او هلکانو ملاتړ کوي.
یاد سازمان زیاته کړې:« د پوهنې او روزنې نړیوالې ورځې په مناسبت یو.اېن.اېڅ.سي.آر د نجونو او هلکانو له زده کړو ملاتړ ته دوام ورکوي، له ننګونو سره سره زده کړې د افغانانو لپاره د هېلو څراخ دی.»
سره له دې چې د نجونو پرمخ د پوهنتونونو له تړلو یو کال تېرېږي خو ځېنې زده کړیالانې تمه لري چې دا حق به ورکول کېږي او خپلو هېلو ته به رسېږي.
افغان زده کړیاله مذلفه کاکړ وايي: « نړۍ دا ورځ ډېره په خوښۍ نمانځي، د زده کړو په ارزښتونو او په ټولنه کې د هغې پر اغېزو بحثونه کېږي؛ خو له بده مرغه د دې ورځې په رارسېدو سره زموږ په هېواد کې نه یوازې دا چې نمانځنه نه کېږي، بلکې هغه درد چې د دې هېواد د ښځو او نجونو په زړه کې دی د بیان وړ نه دی. له درېیو کلونو راهیسې د نجونو پرمخ د ښوونځيو دروازې تړل شوې دي، پوهنتون او د کورسونو دروازې هم همداسې؛ لنډه دا چې د نجونو پرمخ د زده کړو ټولې لارې تړل شوې دي. دا چې دا څومره په ټولنه، شخصیت او آن د دوی په خپل روح او روان اغېز لري دا هم د بیانولو وړ نه دي.»
د جنورۍ ۲۴مه د زده کړو نړیواله ورځ په ټوله نړۍ کې په داسې حال کې نمانځل کېږي، چې په افغانستان کې د زده کړو بهیر نیمګړی دی او شاوخوا ۸۵۰ ورځې کېږي چې له شپږم ټولګې پورته نجونې ښوونځیو او ۳۹۶ ورځې کېږي چې ښځېنه زده کړیالانې پوهنتون د تګ اجازه نه لري
خو مسوولین وايي، دغه پرېکړه دایمي نه ده او د حل لپاره یې په چټکۍ سره کار روان دی.
