عبدالله عبدالله د پنځوس کمېټو د راپورونو له اورېدو وروسته یوې خبري ناستې ته وویل چې ټولو کمېټو کې د طالب بندیانو ازادېدو ټینګار شوی او په دې برخه کې شرطونه او تضمینونه هم وجود لري.
د جرګې په دویمه ورځ ۵۰ کمېټو د طالب بندیانو د خوشې کېدو په اړه مثبته رایه ورکړې، خو اوربند، نړیوال او ملي تضمینونه یې د شرط په توګه وړاندې کړي دي، چې بیا به دا شمېر طالب بندیان د جګړې ډګر ته نه ورځي.
د جرګې مشر عبدالله عبدالله نن یوې یوې خبري ناستې ته وویل چې جرګه کې د ټولو روحیه د سولې لپاره وه او ټولو د طالب بندیانو د خوشې کېدو لپاره د ځینو شرطونو په وړاندې کولو سره توافق کړی ده چې باید تضمین واخیستل شي.
ښاغلي عبدالله هغه راپورنه هم رد کړل چې باور کېده په څلور سوه طالب بندیانو کې بهرنیان هم شته دي.
ښاغلي عبدالله دغه راز په خپلو خبرو کې وویل، د څلور سوه بندیانو په ازادېدو سره به درې ورځو کې طالبانو سره د سولې مزاکرات پیل شي.
هغه په وینا د بندیانو له خوشې کېدو وروسته د سولې په برخه کې نور خنډونه نه شته او ټولې موانع له منځه تللي دي.
د یکشنې په ورځ به جرګه پای ته ورسېږي او جرګه به خپله پرېکړه هم اعلان کړي.
د جرګې دویمه ورځ کې هم د تېرې ورځې جنجال د څه وخت لپاره ګډوډي رامنځ ته کړه چې د فراه خلکو استازې بلقیس روشن او مدني فعال سیال غورځنګ ته په کې سپکاوی شوی و.
