د مشورتي لویې جرګې غړي به نن د طالب بندیانو د برخلیک په اړه بحثونه کوي
نن به د جرګې غړې په 50 کمېټو کې د طالبانو د ۴۰۰ بندیانو د برخلیک ترڅنګ له طالبانو سره د راتلونکو بین الافغاني مذاکراتو په اړه د افغانانو غوښتنې شریکې او افغان حکومت ته وسپاري.
د مشورتي لویې جرګې کابو 50 کاري کمېټو تېر ماښام د خپلې لومړنۍ کاري ورځې راپور شریک کړ.
په پارلماني چارو کې د دولت وزیر او د مشورتي لویې جرګې غړی ضیاءالحق امرخېل ویلي کمېټو د هغو څلور سوه طالب زندانیانو پر سر چې په ازادېدو یې جنجال دی، مشورې او بحثونه وکړل.
امرخېل وویل، نن شنبه به د جرګې ګډونوال خپل اصلي بحثونه پای ته ورسوي او مالومه نه ده چې جرګه به پر دویمه ورځ پای ته ورسېږي او که درېیمې ورځې ته به وغځېږي.
د مصالحې عالي شورا مشر عبدالله عبدالله وایي، په دې حساس پړاو کې د جرګې ګډونوالو تصمیم به تل پاتې او با عزته سولې ته د رسېدو په برخه کې یو ښه لارښود اوسي.
د عبدالله په وینا که څوک فکر کوي د جنګ له لارې بریالي کېدای شي دا سمه نه ده او اوس ټول افغاانان په یوه خوله دي.
د مشورتي لويي جرګې له جوړېدو سره یو شمېر سیاسیونو مخالفت کړی.
صلاح الدین رباني دغه جرګه نمایشي او له قانون سره په ټکر کې بللې ده.
اوسني طالبان هم ورسره مخالفت لري خو یوشمېر پخواني طالبان یې هغه وخت پرځای بولي چې د پاتې طالب زندانیانو آزادولو مشوره ورکړي.
